VOV4.Jarai - Hơdôm hrơi rơgao, ƀơi tơring čar Gialai, hơdôm khul ling tơhan ƀơi tơring čar hmâo gum hrom klă laih hăng Grŭp črâo bruă pơgang, pơgăn klin Covid-19 hơdôm gưl pok pơhai hơdôm bruă pơgang, pơgăn klin. Anai lĕ sa amăng hơdôm khul ba jơlan hlâo, nao mă bruă pơgang pơgăn klin Covid-19 ƀơi tơring čar. Hơdôm bôh anom kơtưn rah bruă wai lăng ƀơi kual guai dêh čar, djru rah gơnam tam mă yua gah ia jrao, măi mok, khul gum hrom pơgang pơgăn klin.

Mơng kual klin ngă quận Gò Vấp, ƀôn prong Hồ Chí Minh glăi pơ̆ sang ƀơi tơring glông Đức Cơ, tơring čar Gialai, mơng rơnuč blan 7 truh ră anai, ayong Hồ Hữu Trung (tơkeng thun 1998) dưi tŭ jum ba nao pơ̆ kual dô̆ čơlah hơbit mơng Ƀirô git gai Khul ling tơhan tơring čar Gialai. Ayong Trung brơi thâo, hơdôm tơlơi pơkă pơgang klin ƀơi anai dưi hmâo djop mơnuih ngă tui klă biă anun ñu mưn ƀuh hơđong pran jua:

“Ƀing ling tơhan, ƀing ơi ia jrao ƀơi sư đoàn djru bruă klă biă, lăng ba tơlơi hơdip mơda adơi ayong. Gah bruă agaih rơnăk, amăng hăng gah rơngiao leng kơ pơhlôm, gơnam ƀong huă pơhlôm klă. Kâo hmâo pơčrang lăng 3 wot, leng kơ ƀu ƀuh kơman ôh. Kâo pơ ala brơi kơ abih bang mơnuih ngă tui tơlơi dô̆ čơlah, bơni kơ ƀing apăn bruă tơhan, ling tơhan ƀơi anai hmâo abih pran jua djru brơi, lăng ba ƀing gơmơi”.

Ƀing ơi ia jrao ling tơhan pel ĕp tơlơi suaih pral rim hrơi kơ mơnuih dô̆ čơlah

Dong mơng akô̆ thun truh ră anai, Ƀirô git gai Khul ling tơhan tơring čar Gialai hmâo pơphun dô̆ čơlah brơi rơbêh kơ 13.500 wot čô mơnuih. Ră anai, ƀơi 33 bôh anih anom gah puih kơđông, glăk hmâo rơbêh kơ 6.700 čô mơnuih dô̆ čơlah. Kiăng bruă dô̆ čơlah pơhlôm klă, pơhlôm hlâo huĭ lar bơrơkua nao rai.

Ƀirô git gai Khul ling tơhan tơring čar hmâo jao laih bruă mă kơ Anom bruă gơnam ƀong huă, ƀơi anăp lĕ Grŭp ơi ia jrao ling tơhan prăp lui djop gơnam mă yua gah ia jrao, măi mok, mơnuih gum hrom pơgang, pơgăn klin. Mơta pơkon, anom gơgrong hlâo gum hrom hăng Ling tơhan pơgang guai lŏn ia tơring čar lăi pơhing hăng ngă tui hơdôm bruă pơgang, pơgăn klin, ngă hơdư̆ hĭ tơlơi lar hyu amăng mơnuih mơnam plơi pla; ba nao 78 čô mơnuih apăn bruă tơhan, ling tơhan gum hrom hăng hơdôm bôh puih kơđông pơgang guai lŏn ia pơphun hyu tir pơgang guai lŏn ia, pơgăn mut tơbiă ƀu djơ̆ phiăn, lăi pơhing kơ pơgang, pơgăn klin.

Trung tá Lê Hồng Tuấn, Khua pui kơđông pơgang guai lŏn ia ƀơi Ia Chía, Ling tơhan pơgang guai lŏn ia tơring čar Gialai brơi thâo: Anom wai lăng rơbêh kơ 7 km glông guai lŏn ia, pơpha dua grŭp dô̆ gak, rim grŭp mơng 5-7 čô mơnuih, amăng anun hmâo 4 čô mơnuih apăn bruă ling tơhan dưi iâu nao mơng Ƀirô git gai Khul ling tơhan tơring čar Gialai. Ƀing apăn bruă tơhan, ling tơhan dô̆ gak na nao, hyu tir guai lŏn ia, pơsit pran jua pơgăn mơnuih mut tơbiă ƀu djơ̆ phiăn; gơgrong hlâo lăng tui kơjăp anih anom, gum hrom hăng plơi pla pel ĕp, thâo krăn rơbêh kơ 1.000 čô mơnuih mơng hơdôm anih anom pơkon pơwot glăi, pok pơhai ngă tui hơdôm yak lăi pơthâo tơlơi rô hyu, pel ĕp drơi jăn.

Đại tá Huỳnh Việt Dũng, Kơ-iăng Khua git gai Ƀirô git gai Khul ling tơhan tơring čar Gialai brơi thâo, Ƀirô git gai Khul ling tơhan tơring čar hmâo pơkiăo nao laih hơdôm rơtuh čô mơnuih apăn bruă tơhan, ling tơhan hăng khul tơhan pơgang mă pô ngă tui bruă tŭ jum, agaih rơnak, pơdjai kơman hăng gơnam ƀong huă amăng kual dô̆ čơlah pơhlôm tơlơi pơkă pơgang, pơgăn klin:

 “Ră anai, ƀing gơmơi gum hrom hăng hơdôm gơnong bruă prăp lui djop hơdôm jơlan gah tŏng ten, kơjăp mơng bruă pơpha rơdêh kông ang ba jơlan nao pơ̆ anih mă ia khak djơ̆ tơlơi pơkă mơng Ding jum ia jrao pơhlôm ƀu lar bơrơkua nao rai, rơngiă anô̆ pơhlôm amăng kual dô̆ čơlah”.

Ling tơhan tŭ mă gơman ƀong huă, pơhlôm gơnam ƀong huă kơ hơdôm kual dô̆ čơlah

Hrom hăng Ƀirô git gai Khul ling tơhan tơring čar Gialai, amăng 2 tal klin ngă ƀơi tơring čar mơng akô̆ thun truh ră anai, Tiểu đoàn Hoá học (Ƀirô pơphôm bruă) hăng grŭp kơsem min ia jrao pơhlôm hlâo (Anom djru ia jrao gum gơnam ƀong huă) gah Quân đoàn 3 (Ding jum khul ling tơhan) pơphun mơtăm bruă pơdjai kơman ƀơi hơdôm anih klin ngă pơ̆ anih klin ngă plơi prong Ayun Pa, tơring glông Ia Pa, plơi prong Pleiku. Đại úy Phạm Văn Hùng, Khua Tiểu đoàn D30, Anom măi mok, Quân đoàn 3 brơi thâo: Mơng blan 7 truh ră anai, kiăng djru tơring čar pơsir anih anom dô̆ čơlah lom mơnuih mơng kual Dơnung dêh čar pơwot glăi bĕ klin, ƀing apăn bruă tơhan, ling tơhan hmâo pioh laih puih kơđông, pơphun dô̆ čơlah brơi 500 čô mơnuih ƀôn sang:

 “Ƀing gơmơi prăp lui klă anih anom mă yua, tŭ jum mơnuih tui tơlơi pơkôl mơng tơring čar. Tiểu đoàn tơdơi nao pơ̆ anih phrâo, ƀing gơmơi tañ hơđong grŭp, pơphun anih ƀong huă, anih dô̆ phrâo, pơhlôm djơ̆ tơlơi pơkă, ngă giong bruă mă dua mơta sa wot anun lĕ pơgang pơgăn rah klin, ngă giong rah hơdôm tơhnal pơkă kơčăo bruă, bruă mă măi mok”.

Ngă tui tơlơi črâo ba mơng Quân khu 5, phrâo anai,  Ƀirô git gai Khul ling tơhan tơring čar Gialai hmâo ƀơi anăp, gum hrom pel ĕp 4 anih anom ƀơi tơring čar kiăng pơdŏng sang ia jrao mă yua lom kiăng pioh pơjrao kơ mơnuih ƀă Covid-19. Kiăo tui anun, anom hmâo ruah laih Sang hră Cao đẳng Gialai ngă Sang ia jrao mă yua lom kiăng pơjrao brơi kơ mơnuih ƀă kơman Covid-19 rơnang, gah Ƀirô git gai khul ling tơhan tơring čar Gialai. Hrom hăng pơhlôm gơnam mă yua, amăng măi mok, ia jrao gun, sang ia jrao hmâo khul mơnuih apăn bruă, mơnuih mă bruă lĕ mơnuih gah gơnong bruă ia jrao mơng hơdôm bôh puih kơđông ling tơhan ƀơi tơring čar Gialai.

Hăng pran jua ba jơlan hlâo, abih bang yua kơ tơlơi pơhlôm, tơlơi suaih pral mơng mơnuih ƀôn sang, hơdôm khul ling tơhan mơng Quân khu V hăng Quân đoàn 3 (Ding jum khul ling tơhan) ƀơi tơring čar Gialai glăk hmâo lu bruă mă ba glăi bôh tơhnal, sit nik jing sa amăng hơdôm khul ba jơlan hlâo ƀơi anih pơgang, pơgăn klin Covid-19 ƀơi tơring čar./.

Siu H’ Prăk: Pô pơblang