VOV4.Jarai - Ƀirô git gai Khul ling tơhan tơring čar Lâm Đồng phrâo kĭ jơlan hơdră gum hrom bruă mă hăng Grŭp wai lăng Khul đăo phơ̆t dêh čar Việt Nam tơring čar Lâm Đồng. Bruă gum hrom amra djă pioh kơjăp hloh dong tơlơi rô nao rai kơplah wah ling tơhan hăng mơnuih ƀôn sang, ngă tui pran jua gum hrom hơbit djuai ania. Hrom hăng anun lĕ gru than kiăng ngă klă bruă “Pơtô ba mơnuih ƀôn sang klă” hăng “Mơnuih ƀôn sang thâo amăng pơdŏng plơi pla phrâo”.

Amăng hơdôm thun rơgao, tơring čar Lâm Đồng lăng ba na nao bruă đăo gưt, tơlơi đăo. Mơng anun, pơjing pran jua jê̆ giăm, thâo hluh nao rai kơplah wah hơdôm khul đăo hăng hơdôm bôh ƀirô, grŭp, gơnong bruă hăng gong gai plơi pla. Bôh nik anun hmâo pơsit laih hơdră bruă pioh tơlơi đăo lăp djơ̆ mơng Ping gah hăng Kơnuk kơna; neh wa tui đăo lĕ sa amăng hơdôm khul ƀu dưi kah đuăi mơng khul gum hrom hơbit djuai ania.

Đăo phơ̆t hăng khul ling tơhan mơng hlâo truh ră anai ăt gum hrom na nao mơn amăng lu bruă mă. Tơlơi gum hrom anun hmâo tơlơi gum hơgô̆p djă pioh kơjăp tơlơi rơnuk rơnua bruă kơđi čar, hơđong pơhlôm mơnuih mơnam. Hrom hăng anun, djru pơđĭ tui gru rŭp ling tơhan Wa Hồ amăng pran jua mơnuih ƀôn sang.

Ngă tui Tơlơi črâo ba mơng Ping gah Khul ling tơhan dêh čar ta hăng kơčăo bruă mơng Ping gah Quân khu 7 kơ pơplih phrâo hăng kơtưn git gai, črâo ba Khul ling tơhan ngă tui bruă đăo amăng rơnuk anai, Ƀirô git gai Khul ling tơhan tơring čar Lâm Đồng hmâo kĭ pơkôl laih jơlan hơdră gum hrom bruă mă hăng Grŭp wai lăng khul đăo phơ̆t Việt Nam tơring čar amăng akô̆ blan 4 phrâo rơgao.

Ƀirô git gai Khul ling tơhan tơring čar Lâm Đồng nao čuă hăng hơ-ư̆č hmưi Grŭp Linh Quang, plơi prong Đà Lạt ƀrô djơ̆ tal Jơnum Vu Lan

Đại tá Trần Văn Khương – Mă bruă gah Ƀirô git gai Khul ling tơhan tơring čar Lâm Đồng pơsit: “Bruă kĭ pơkôl jơlan hơdră gum hrom anai kiăng kơtưn đĭ khul gum hrom hơbit djuai ania, pơdŏng hăng hơkrŭ đĭ tơlơi jê̆ giăm, pran mut hrom, kĕ phĭ kơplah wah khul ling tơhan tơring čar hăng Grŭp wai lăng khul đăo phơ̆t Việt Nam tơring čar; ngă tui bruă mơng Khul đăo phơ̆t Việt Nam tơring čar Lâm Đồng amăng bruă pơdŏng hăng pơgang lŏn ia. Mơng anun, djru djă pioh kơjăp tơlơi rơnuk rơnua kơđi čar, hơđong pơhlôm mơnuih mơnam hăng pơđĭ kyar bơwih ƀong, bôh thâo, mơnuih mơnam ƀơi đơ đam tơring čar”.

Kiăo tui anun, bôh yôm gum hrom mơng thun 2021-2025 hmâo: Lăi pơthâo bôh thâo pơgang lŏn ia hăng rơnuk rơnua plơi pla kơ mơnuih apăn bruă đăo, mơnuih kom drơi kơ yang, bruă apăn, mơnuih tui đăo; tơlơi pơhing kơ hơdră pơtrun, jơlan gah mơng Ping gah, hơdră bruă, tơlơi phiăn mơng Kơnuk kơna, tơlơi pơgang lŏn ia, rơnuk rơnua plơi pla, pơsit jơlan gah tơlơi pơmin kơ ƀing apăn bruă đăo, mơnuih kom drơi kơ yang, bruă apăn, mơnuih tui đăo... Gum hrom lăi pơhing, pơtrut pơsur hlăk ai lĕ ană bă mơnuih tui đăo ngă tui tơpă bruă nao ngă tơhan. Gum hrom pơphun lăi pơhing tơlơi pơhing phrâo kiăng ƀing apăn bruă, mơnuih kom drơi kơ yang, mơnuih apăn bruă hăng mơnuih tui đăo thâo hluh rơđah, tŭ ư hrom hrưn đĭ kơdŏng glăi hơdôm tơlơi pơčeh ča, pơsuh mơng kơdŏng glăi kơnuk kơna, kơdŏng glăi lŏn ia pô mă tŭ tơlơi đăo pioh kơdŏng glăi. Pơphun brơi ling tơhan mă bruă hmâo hyu mă bruă pơtô ba mơnuih ƀôn sang djru mơnuih ƀôn sang, neh wa đăo phơ̆t kual ataih, asuĕk hrŏ trun tơlơi rin rơpa. Pơphun bưp ƀô̆ mơta, hyu tơña bla, hơ-ư̆č hmưi ƀrô djơ̆ hơdôm hrơi jơnum prong mơng Khul ling tơhan hăng khul đăo Phơ̆t. Gum hrom ngă tui ba glăi bôh tơhnal hơdôm bruă mă kah hăng pơdŏng “Sang dô̆ thâo tơngia ling tơhan hăng mơnuih ƀôn sang”, “Sang dô̆ gum hrom hơbit” kơ mơnuih đăo phơ̆t hmâo tơlơi hơdĭp tơnap tap, hơdôm ring bruă mă yua kơ bôh thâo, bơkơjăp drơi jăn ƀơi hơdôm anih anom jơnum mơng khul đăo phơ̆t.

Hòa thượng Thích Thanh Tân – Khua Grŭp wai lăng khul đăo phơ̆t Việt Nam tơring čar Lâm Đồng pơsit, Khul đăo phơ̆t Việt Nam tơring čar amra pok pơhai ha amăng plĕ, abih bang hơdôm bôh yôm gum hrom mơng gưl tơring čar truh gưl tơring glông. Neh wa đăo phơ̆t ăt amra dŏng yua, djru ba mơn mơnuih apăn bruă tơhan, ling tơhan tơring čar ngă hơdôm bruă mă pô dưi.

Đại tá Nguyễn Công Anh – Kơ-iăng Khua apăn bruă kơđi čar Quân khu 7 hmâo pơsit yôm bôh yôm gum hrom; hrom hăng anun, pơsit Ƀirô git gai Khul ling tơhan tơring čar Lâm Đồng lĕ sa amăng hơdôm anom bruă ba jơlan hlâo amăng ngă tui bôh yôm anai ƀơi Quân khu 7. Ăt ƀơi anai mơn, rơngiao kơ bruă lăi nao hơdôm bruă mă kiăng ngă tơdơi kơ kĭ pơkôl, Kơ-iăng Khua apăn bruă kơđi čar Quân khu 7 lăi rơđah bruă kiăng ngă klă tơlơi lăi pơhing pioh pơsit hloh dong bruă mă hăng tơlơi kĕ phĭ hrom kơplah wah khul ling tơhan hăng khul đăo phơ̆t ƀơi Dăp Kơdư.

Khua Grŭp pơtô ba mơnuih ƀôn sang Ping gah tơring čar Lâm Đồng Phạm Thị Phúc pơdah pran jua tơlơi mơ-ak klă hăng pran đăo gơnang kơ bruă kĭ pơkôl jơlan hơdră gum hrom bruă mă kơplah wah Ƀirô git gai Khul ling tơhan tơring čar hăng Grŭp wai lăng khul đăo phơ̆t Việt Nam tơring čar Lâm Đồng. Čang rơmang lĕ, bruă gum hrom amra djă pioh kơjăp hloh dong tơlơi rô nao rai kĕ phĭ hrom ling tơhan hăng mơnuih ƀôn sang, ngă tui pran jua gum hrom hơbit djuai ania. Anun amra lĕ phun than pioh ngă tui klă bruă “Thâo pơtô ba mơnuih ƀôn sang” hăng “Thâo pơtô ba mơnuih ƀôn sang pơdŏng plơi pla phrâo”. Khul ling tơhan hăng Khul đăo phơ̆t amra gum hrom dong kiăng djru ngă tui truh kih bruă ruah khua pơ ala mơnuih ƀôn sang dêh čar ta tal 15 hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026 pơ̆ anăp./.

Siu H’ Prăk: Pô pơblang