VOV4.Jarai -  Hăng pran jua “Yua kơ mơnuih ƀôn sang mă bruă”, Khul ling tơhan mơnuih ƀôn sang dêh čar Việt Nam glăk jing khul yôm phăn gum hrom pơgang pơgăn klin Covid-19 amăng đơ đam dêh čar ta, biă ñu ƀơi hơdôm bôh tơring čar kual Dơnung dêh čar.

Ngă tui Tơlơi črâo ba mơng Khua dêh čar ơi Phạm Minh Chính kơ kơtưn hơdôm khul ling tơhan gum hrom pơgang, pơgăn klin Covid-19 amăng ƀôn prong Hồ Chí Minh hăng hơdôm bôh tơring čar kual Dơnung dêh čar, mơng lơ 20/8/2021, lu wot mơnuih apăn bruă tơhan, ling tơhan, kông ang, mơnuih mă bruă gah ia jrao ƀơi djop anih amăng lŏn ia hmâo djru tañ kơ hơdôm bôh tơring čar gah Dơnung dêh čar. Gru rŭp ƀing ling tơhan, kông ang, tơhan plơi hrom hăng hơdôm khul grŭp pơkon hyu pơpha brơi gơnam ƀong huă kơ mơnuih ƀôn sang djru mơnuih ƀông sang pơjrao tơlơi ruă klin Covid-19 ƀơi sang, gum hrom pơhlôm hơđong tơlơi rơnuk rơnua mơnuih mơnam... sit nik jing anih gơnang pran jua prong hăng mơnuih ƀôn sang ƀôn prong Hồ Chí Minh hăng hơdôm bôh tơring čar jum dar.

Hăng khul ling tơhan, ngă tui hơdôm bruă jĕc yua kơ tơlơi hơdip mơnuih ƀôn sang lĕ bruă mă juăt laih hăng khul. Biă ñu mơng gru grua đưm hăng anô̆ dơlăm bôh thâo, khul ling tơhan Việt Nam hmâo phiăn juăt kĕ phĭ hrom kơjăp hăng mơnuih ƀôn sang. Tơlơi rô nao rai kơjăp anai dưi pơhrua nao hăng pơtrut lŏm găn rơgao thun blan. Khul ling tơhan mơnuih ƀôn sang dêh čar Việt Nam mơng mơnuih ƀôn sang pơjing, yua kơ mơnuih ƀôn sang mă bruă, tuh rơyuh pran jua, anun pran jua tơhan hăng mơnuih ƀôn sang dưi pơhmu nao hăng akan hăng ia. Yua anun, khul ling tơhan ƀu djơ̆ kơnong kơ mă bruă ling tơhan mơng pô lĕ pơhrăm blah, pơgang lŏn ia ôh mơ, dô̆ gum djru mơnuih ƀôn sang dong lom mơnuih ƀôn sang bŏng glăi hăng ayuh hyiăng, tơlơi truh. Gru rŭp khul ling tơhan yuă pơdai djru mơnuih ƀôn sang amăng ia ling dăo, kơthel, ba đuăi mơnuih ƀôn sang nao pơ̆ anih pơhlôm amăng bơyan hơjan kơthel, hyu hơduah ĕp mơnuih ƀôn sang hmâo tơlơi truh, rơngiă theng juăt laih ƀơi Việt Nam. Bruă ling tơhan gum hrom pơgang, pơgăn klin Covid-19 ƀơi ƀôn prong Hồ Chí Minh hăng hơdôm bôh tơring čar kual Dơnung dêh čar tal anai jing tơlơi tô̆ tui mơng pran jua kĕ hrom sit nik kơplah wah khul ling tơhan hăng mơnuih ƀôn sang Việt Nam amăng gru grua.

Ƀôn prong Hồ Chí Minh hăng hơdôm bôh tơring čar gah Dơnung dêh čar hmâo hăng glăk găn rơgao tal pơgang pơgăn klin Covid-19 tơnap tap biă yap mơng akô̆ blan 5/2021 truh ră anai. Abih bang hơdôm bôh ƀirô mơng glông bruă kơđi čar hăng mơnuih ƀôn sang leng kơ glăk bŏng glăi hăng lu tơlơi tơnap tap bơrơkua đĭ. Hơdôm khul mơnuih mă bruă pơgang klin ƀơi ƀôn prong hăng hơdôm bôh tơring čar hmâo hăng glăk mă bruă abih pran jua pô ƀu thâo kơ hrơi mlăm. Tơlơi pơtrun dưi gơgrong lom anai lĕ khom dưi pơgăn klin ruă. Anun ƀu djơ̆ pran pơsit hăng tơhnal pơkă dlông hloh mơng ƀôn prong Hồ Chí Minh, mơng hơdôm bôh tơring čar glăk bơdjơ̆ nao prong yua kơ klin ruă ôh mơ̆, ñu dô̆ jing bruă mă mơng đơ đam lon ia. Yua anun, pơsit ba khul ling tơhan gum hrom hơdôm khul pơgăn klin ƀơi ƀôn prong Hồ Chí Minh hăng hơdôm bôh tơring čar, kiăng pơđĭ tui hloh dong bôh tơhnal dô̆ čơlah mơnuih mơnam, pơgăn klin ruă, pơgang hlôm hlâo hơdôm bôh than ƀu hơđong kơđi čar, pơhlôm rơnuk rơnua mơnuih mơnam jing kiăng biă.

Hrom hăng khul ơi nai ia jrao, ƀu hmâo khul hơpă juăt bruă hăng ba glăi bôh tơhnal hloh kơ khul ling tơhan ngă tui bruă anai. Yua kơ, dong mơng phun hnâo klin gluh đĭ, khul ling tơhan jing khul phun amăng bruă pơgang, pơgăn klin ruă ƀơi Việt Nam. Truh ră anai, khul ling tơhan hmâo hăng glăk gơgrong hơdôm bruă mă, mơng bruă wai lăng guai dêh čar, mă yua hơdôm kual dô̆ čơlah hơbit, ngă tui pơdjai kơman, pơphun bruă asơi huă, añăm ƀong, ia jrao gun, pơphun pơčrang lăng hăng tlâ̆o vaccine kơ mơnuih ƀôn sang, truh kơ ruah mă, pơjrao hăng wot djru kơ mơnuih djai dong.

Khul ling tơhan Việt Nam gum hrom pơgăn klin Covid-19 ăt lĕ phiăn juăt jar kơman amăng hơdôm hrơi klin Covid-19 glăk lar tư̆p hyu đơ đam rŏng lŏn tơnah. Lu dêh čar hmâo hăng glăk iâu pơhrui khul ling tơhan gum hrom bŏng glăi hăng tơlơi gluh đĭ mơng klin Covid-19. Bruă djru pơgang, pơgăn klin mơng hơdôm khul anai lu mơta biă, mơng bruă djru pơgang pơgăn klin, pơphun brơi gơnam mă yua, pơpha braih piang hăng ia jrao gun kơ mơnuih ƀôn sang, ƀơi anăp gum hrom pơjrao brơi mơnuih ƀôn sang, djă pioh hơđong plơi pla, pơhlôm mơnuih ƀôn sang ngă tui hơdôm bruă ngă hơdư̆ rô hyu hăng dô̆ cơlah mơnuih mơnam mơng gong gai. Rơngiao kơ anun, khul ling tơhan lu bôh dêh čar dô̆ pok pơhai khul djru gơnam tam kiăng djru brơi blơi prăp, bơwih ƀong huă, rak pioh, dŭ pơgiăng, pơpha hyu hơdôm gơnam mă yua, amăng anun hmâo sum ao pơgang drơi, măi suă pran hăng oxy.

Lu puih kơđông ling tơhan đa gơgrong wot bruă pơčrang lăng Sars-CoV-2 ba hyu, ruah mă hăng ƀơi anăp pơjrao brơi kơ mơnuih djơ̆ klin. Rơđah biă ñu kah hăng ƀơi dêh čar Khač, năng ai ñu 10.000 čô mơnuih mă bruă ia jrao gah ling tơhan dưi iâu nao hăng pok pơhai tui hơdôm tal pha ra kiăng pơjrao brơi kơ mơnuih djơ̆ klin Covid-19 lom hmâo klin ruă gluh đĭ ƀơi ƀôn prong Vũ Hán, tơring čar Hồ Bắc. Ƀơi Hàn Quốc, khul ling tơhan ăt jing pô djru yôm phăn lom wai lăng klin ngă. Ƀơi dêh čar Anglê, Ding jum khul ling tơhan dêh čar anai lom akô̆ thun anai pơsit bŏng glăi mơng khul ling tơhan hăng klin Covid-19 jing laih bruă mă ling tơhan amăng lŏn ia prong hloh amăng rơnuk anai, hăng rơbêh kơ 5.000 čô ling tơhan plơi gum hrom jơlan hơdră tlâ̆o vaccine Covid-19, pơčrang lăng ƀơi lu anih hăng hơdôm bruă djru gơnam kiăng yua pơkon. Bơ̆ ƀơi dêh čar India, lom akô̆ blan 5 phrâo rơgao, dêh čar anai hmâo pơdŏng Anom wai lăng Covid-19 yua kơ Kơ-iăng khua pơphô bruă khul ling tơhan ƀơi anăp lăng tui, kiăng pơpha hyu hơdôm bruă mă djru mơnuih ƀôn hăng gơnam ƀong huă, gum hrom hăng hơdôm bôh ƀirô ling tơhan bơdjơ̆ nao.

Khă hơdră pơkă hăng rơnoh pok pơhai ăt kah hăng bruă djru gum pha ra, samơ̆ khul ling tơhan lu bôh dêh čar, amăng anun hmâo khul ling tơhan dêh čar Việt Nam, glăk djru ba glăi hơdôm bôh than yôm phăn, amăng anun ba tơbiă kơčăo bruă pơsir tơlơi rung răng, črâo ba hăng wai lăng, djru gơnam ƀong huă hăng ia jrao amăng tơlơi klin Covid-19 ngă./.

              VOV1: Pô čih – Siu H’ Prăk: Pô pơblang