VOV4.Jarai - Mơguah lơ 6/9, ƀơi Hà Nội, Khul mơnuih mă bruă Việt Nam pơphun Jơnum bruă bơkơtưn “Kông ñơn, mơnuih mă bruă ƀơi sang bruă kơnuk kơna, mơnuih mă bruă gah rơngiao gir găn rơgao tơlơi tơnap, pơčeh tơlơi rơgơi phrâo, gir dưi pơgang klin Covid-19” truh 83 anih pơhmư̆ jơnum amăng dêh čar. Klin Covid-19 hơđuh tal 4 mơng lơ 27/4 truh ră anai, hơmâo lu tơlơi glêh tơnap, bơbeč lu kơ tơlơi hơdip mơnuih ƀon sang hăng tơlơi hơđong kơjăp, pơđĭ kyar bơwih ƀong huă - mơnuih mơnam mơng lŏn ia. Khă hnun hai, abih bang anom bruă čar hăng mơnuih ƀon sang thâo gum djru nao rai, gir run ngă tui hơdră pơgang klin. Ƀơi mông pơphun bruă, Khua Khul mơnuih mă bruă Việt Nam Nguyễn Đình Khang jak iâu abih bang mơnuih mă bruă pơtrut tui gru grua khăp kơ lŏn ia, abih pran jua ngă bruă, gir ngă klă hloh dong, găn rơgao tơnap tap, tơlơi lông, bơkơtưn ngă bruă kiăng tañ dưi pơgang klin, pơjing glăi tơlơi bơwih ƀong huă.

Siu H’Mai: Pơblang