VOV4.Jarai - Tơdơi kơ 3 hrơi mă bruă tơpă, gơgrong, lom lơ 10/12, Khul pơ ala mơnuih ƀôn sang tơring čar Daklak tal 10, rơwang bruă 2021-2026 hmâo ngă giong jơlan hơdră mă bruă mơng Tal jơnum lok 3 hăng lu bôh yôm phăn hăng pơphun pơđut tal jơnum. Hluai tui bơkơtuai, pel ĕp abih bang, tŏng ten hơdôm tơlơi lăi pơthâo glăi, hră lăi pơthâo, Tal jơnum hmâo tŭ ư prong pel ĕp 30 mơta Tơlơi pơtrun pơsit.

Amăng anun lu tơlơi pơtrun pơsit yôm phăn, djru kơ pơđĭ kyar bơwih ƀong bôh thâo – mơnuih mơnam; pơhlôm pơgang lŏn ia, rơnuk rơnua plơi pla mơng tơring čar kah hăng: Tơlơi pơtrun pơsit kơ tơhnal pơkă pơđĭ kyar bơwih ƀong – mơnuih mơnam, pơhlôm pơgang lŏn ia rơnuk rơnua plơi pla thun 2022; Kơčăo bruă pơdŏng hăng pơđĭ kyar ƀôn prong Buôn Ma Thuột truh thun 2030, tơhnal lăng truh thun 2045; djru pơđĭ kyar bơwih ƀong grŭp tơring čar Daklak rơwang 2021-2025. Pơhiăp pơđut Tal jơnum, ơi Y Vinh Tơr, Ding kơna pơhlôm hlâo mơng Ping gah, Khua Khul pơ ala mơnuih ƀôn sang tơring čar, Khua Grŭp khua pơ ala mơnuih ƀôn sang tơring čar Daklak lăi rơđah, hơdôm tơlơi pơtrun pơsit dưi pel ĕp amăng Tal jơnum hmâo bôh tŭ yua yôm phăn hăng bruă ngă tui truh kih bruă pơđĭ kyar bơwih ƀong – mơnuih mơnam mơng tơring čar thun 2022 hăng hơdôm thun tô̆ tui./.

Siu H’ Prăk: Pơblang