VOV4.Jarai - Tŏ tui hơdôm hrơi jơnum lok 3, Khul pơ ala mơnuih ƀon sang tơring čar Daklak tal X, lơ 9/12 ƀing khua mua hơmâo pơčrông sai kơ hră mơ-it bơdjơ̆ nao bruă pơđĭ kyar bơwih ƀong huă-mơnuih mơnam amăng tơring čar thun 2022 hăng rơwang thun 2020-2025. Djop bruă bơdjơ̆ nao pơhưč tuh pơ alin, ĕp brơi bruă mă kơ mơnuih ƀon sang yua kơ klin Covid-19 ngă hơmâo lu khua mua đing nao. Thun 2021, rơnoh pơđĭ kyar amăng bơwih ƀong huă amăng tơring čar Daklak lĕ 5,1%, him lăng amăng thun 2022 gir run đĭ 7,27%, tui hăng ƀing khua mua, kiăng kơ dưi ngă tui hơnong pơkă anai amăng hrơi blan klin dŏ ngă tơnap tap, Jơnum min mơnuih ƀon sang tơring čar kiăng đing nao pơsir hĭ hơdôm tơlơi tơnap amăng pơhưč tuh pơ alin.

Ƀing khua mua sem lăng hră pơ-ar bơdjơ̆ nao bruă pơđĭ kyar bơwih ƀong huă -mơnuih mơnam tơring čar Daklak thun 2022

Sit biă ñu lĕ tơlơi tơnap amăng akŏ bruă mă yua lŏn mơnai hăng bruă duh glăi prăk kơ mơnuih ƀon sang. Hrŏm hăng anun đing nao pơhưč tuh pơ alin, bruă ĕp brơi bruă mă kơ mơnuih ƀon sang hơmâo khua mua lăi nao. Tui hră lăi pơthâo mơng gơnong bruă mă tơhan rơka hăng mơnuih mơnam tơring čar Daklak, lơ̆m klin Covid-19 hơđuh đĭ tal 4, hơmâo giăm 140.000 čô mơnuih glăi mơng hơdôm tơring čar kual Dơnung. Amăng anun hơmâo giăm 24% mrô mơnuih kiăng dŏ glăi pơ plơi pla hlao hăng čang rơmang dưi čan prăk mơng 20-80 klăk prăk kiăng kơ bơwih ƀong huă. Yua anun, ƀing khua mua rơkâo tơring čar hơmâo hơdră djru čan prăk mă kmlai ƀiă kiăng kơ ngă gêh gal brơi mơnuih ƀon sang bơwih ƀong huă.

Siu Đoan: Pơblang