VOV4.Jarai - “Mơnuih ƀon sang lĕ mơnuih mơng plơi pla pơkŏn glăk dŏ guang dar pơčlah pioh pơgang klin amra plĕ hră ruah Khua pơ ala mơnuih ƀon sang dêh čar tal 15 hăng Khua khul pơ ala mơnuih ƀon sang gưl tơring čar ƀơi anun mơtăm”, Anai lĕ sa amăng hơdôm tơlơi črâo ba phrâo anai mơng Khul pơphun plĕ hră ruah khua lơ 20/5, mơ-it Jơnum min plĕ hră ruah khua hơdôm tơring čar, ƀôn prong kơ bruă pel ĕp, pơsit tơlơi dưi plĕ hră mơng mơnuih ƀon sang glăk pơčlah pioh pơgang klin Covid-19.

Tơlơi pơsit kơ tơlơi dưi nao plĕ hră mơng mơnuih ƀon sang glăk pơčlah ƀơi hơdôm anih pơčlah pơƀut lu mơnuih amra ngă tui tơlơi pơkă amăng tơlơi phiăn plĕ hră ruah Khua pơ ala mơnuih ƀon sang dêh čar hăng khua khul pơ ala mơnuih ƀon sang hăng hơdôm tơlơi črâo ba mơng Khul pơphun plĕ hră ruah khua lăi nao amăng hră pơkă mrô 234 pơtô brơi bruă čih anăn mơnuih nao plĕ hră hăng hơdră pơphun plĕ hră hăng ƀing mơnuih glăk pơčlah ƀudah guang dar tui tơlơi črâo trun mrô 16 mơng Khua dêh čar mơ̆ aka ƀu čih anăn amăng hră jŭ yap ƀing mơnuih nao plĕ hră ƀơi hơdôm anih plĕ hră ƀơi ƀon lan rơkâo Grup pơphun plĕ hră pel ĕp, čih anăn ƀing pô anai laih anun mơ-it nao Jơnum min mơnuih ƀon sang gưl să kiăng pơhrua amăng hră čih anăn mơnuih nao plĕ hră ƀơi kual hơmâo mơnuih glăk pơčlah pioh pơgang klin.

Siu Đoan: Pơblang