VOV4.Jarai - Tui hăng mông jơnum lok 2 Khua git gai pơ ala mơnuih ƀon sang dêh čar tal 15 mơguah anai lơ 22/10, ƀing khua pơhmư̆ Khua ding jum prăk kăk ơi Hồ Đức Phớc, kiăo tui tơlơi jao bruă mơng Khua dêh čar lăi pơthâo hră pơ-ar kơčăo bruă Tơlơi phiăn bơwih ƀong sĭ mơdrô hră pơhlôm nua (pơplih pơkra) hăng Khua ding jum Kế hoạch hăng Đầu tư ơi Nguyễn Chí Dũng, kiăo tui tơlơi jao bruă mơng Khua dêh čar lăi pơthâo Tơlơi pơtrun sa, dua hơdră ngă bruă, tơlơi djru phara pioh pơđĭ kyar mơng hơdôm boh tơring čar, ƀon prong kah hăng Hải Phòng, Nghệ An, Thanh Hóa hăng Thừa Thiên Huế (lu biă ñu lĕ 20 mơnit). Tŏ tui, Khua mua git gai pơ ala mơnuih ƀon sang dêh čar amra hmư̆ tơlơi lăi pơthâo bruă hơduah ĕp pơsit kơ hơdôm tơlơi anai. Či tlam, sa amăng hơdôm tơlơi yôm phun hơmâo ƀing khua bơkơtuai ƀơi grup lĕ bruă ngă tui tơlơi djru, tơlơi pơkă gah prăk pơhlôm nua mơnuih mơnam, wai lăng hăng mă yua keh prăk pơhlôm nua mơnuih mơnam thun 2020. Ƀing khua pơ ala mơnuih ƀon sang hăng ƀing kơhnâo lêng lăi: kiăng hơmâo hơdră pơđĭ tui anŏ tŭ yua mơng keh prăk pơhlôm nua mơnuih mơnam, prăk pơhlôm nua rơngiă bruă mă ră anai hơmâo truh 953 rơbâo klai prăk laih. Hrŏm hăng anun, kiăng bơtơhmal kơtang ƀing ƀu nô̆p prăk, kaih nô̆p prăk pơhlôm nua mơnuih mơnam.

Siu H’Mai: Pơblang