VOV4.Jarai - Phrâo rơgao, ƀơi sang bruă Kơnuk kơna, Kơ-iăng khua dêh čar ơi Trương Hòa Bình, Khua git gai jơlan hơdră dêh čar pơđĭ kyar bơwih ƀong uă - mơnuih mơnam kual mơnuih ƀon sang djuai ƀiă hăng kual čư̆ siăng rơwang thun 2021-2030, git gai mông jơnum mơng Anom git gai bruă čar. Nao pơhmư̆ hơmâo Khua ding jum, Khua Jơnum min djuai ania Hầu A Lềnh, Kơ-iăng khua apăn bruă, khua git gai hơdôm anom bruă, ding jum lĕ ding kơna mơng Anom git gai.

Jơlan hơdră dêh čar pơtrun kơ mơnuih djuai ƀiă hăng čư̆ siăng lĕ 1 amăng 3 jơlan hơdră dêh čar pơtrun rơwang thun 2021-2025, hơmâo Khua pơ ala mơnuih ƀon sang dêh čar pơsit tuh pơ alin hăng mrô prăk mơng Kơnuk kơna ta, yôm biă mă hăng tơlơi pơđĭ kyar bơwih ƀong huă- mơnuih mơnam mơng lŏn ia, djru bơwih ƀong, pơhlôm tơlơi hơdip kơ mơnuih ƀon sang djuai ƀiă hăng kual čư̆ siăng, anai yơh kual rin hloh amăng dêh čar ta. Yua hnun, Kơ-iăng khua dêh čar kiăng hơdôm ding jum anom bruă, anom git gai bruă čar khŏm gơgrong bruă, tañ čih pơkra hăng pơphun ngă kơčăo bruă rơđah rơđông đah mơng dưi ngă truh kih jơlan hơdră anai hlao mơng 3 blan tal 4 thun 2021, arăng iâu qúi 4, djru pơtrut tañ bruă brơi prăk tuh pơ alin, pơsir brơi tơlơi bơbeč yua klin Covid-19 ngă, rŭ glăi tơlơi bơwih ƀong, pơhlôm brơi tơlơi hơdip mơnuih ƀon sang.

Lăi glăi hăng Khua mua git gai bruă čar, Khua ding jum, Khua Jơnum min wai lăng djuai ania ơi Hầu A Lềnh brơi thâo, Jơnum min glăk ngă hrŏm kơjăp hăng ding jum, anom bruă bơdjơ̆ nao prăp lui hră pơ-ar djru brơi Khul khua pel ĕp sem lăng bruă Kơnuk kơna ta pơsit brơi, giong anun pơdah pơƀuh kơ Khua dêh čar pơsit tuh pơ alin tui tơlơi pơtrun. Tơlơi hơmâo lăi nao mơng hơdră bruă hơmâo 10 mơta bruă. Tơlơi gơñăm nao amăng rơwang thun 2021-2025 lĕ ngă anet tui tơlơi pleh ploh kơ tơlơi hơdip, prăk pơhrui mơng mơnuih ƀon sang djuai ƀiă hăng kual čư̆ siăng pơhmu hăng mrô jŭ hrŏm amăng dêh čar; truh thun 2025 hrŏ trun 50% mrô să, plơi pla tơnap tap, truh thun 2030 ƀu hơmâo dong tah să, plơi pla tơnap tap đơi. Prăk pioh kơ rơwang thun anai aset biă mă lĕ 147.000 klai prăk.

Ƀơi mông jơnum, pơ ala kơ anom bruă bơdjơ̆ nao pơbut lăi nao hrơi mông ngă bruă yôm phun, biă ñu lĕ mơng anai truh abih thun 2021, mơnuih mă bruă, bruă kiăng ngă mơng Anom bruă kah pơpha ngă bruă ƀơi Gơnong dlông, mơnuih djru bruă ƀơi hơdôm boh tơring čar, plơi prong, hơdră iâu pơthưr tơlơi djru pơhrua tui dong (kah hăng prăk ODA, prăk gum djru mơng abih bang mơnuih).

Pơhiăp tum pơƀut glăi ƀơi mông ngă bruă, Kơ-iăng khua dêh čar ơi Trương Hòa Bình bơni biă kơ Jơnum min wai lăng djuai ania hăng ding jum, anom bruă, ding kơna amăng Anom git gai bruă Dêh čar hơmâo git gai črâo bruă klă, kiăo tui bruă hơmâo jao tui hăng Akŏ bruă. Khă hnun, Kơ-iăng khua dêh čar ta kiăng Jơnum min wai lăng djuai ania kiăng kơđiăng lui hăng khŏm ngă pơgiong tañ 2 mơta bruă rơgao hrơi pơkă; laih dong kiăng pơdah thâo tañ pơ Khua anom git gai bruă čar kĭ hră, pơtrun tơlơi pơkôl pơkă hăng Jơlan hơdră mă bruă thun 2021 mơng Anom git gai bruă čar kiăo tui tơlơi pơgôp hiăp mơng ding jum, anom bruă ƀơi mông jơnum Khua mua git gai bruă dêh čar lơ 22/3/2021.

Kơ-iăng dêh čar ơi Trương Hòa Bình git gai mông jơnum.

Kơ hơdôm bruă yôm phun amăng 6 blan rơnuč thun, Kơ-iăng khua dêh čar ơi Trương Hòa Bình lăi, hơdôm ding jum, anom bruă bơdjơ̆ nao kiăng ngă hrŏm klă hloh dong, gir ngă giong abih bruă prăp rơmet lui đah mơng dưi pơphun ngă, amăng anun pơƀut čih pơkra giong tơlơi pơtrun, tơlơi pơkă hăng hră pơ-ar pơtô ngă jơlan hơdră. Lăng yôm bruă kơsem min tơlơi rơgơi, ba tơbiă tơlơi pơkôl pơkă, hơdră pơsir kiăng ngă pơhưč, jak iâu lu tơlơi gum djru mơng jar kmar hăng mơnuih ƀon sang pioh ngă Jơlan hơdră. Laih dong, pơtrut hyu pơtô pơblang, iâu pơthưr mơnuih ƀon sang gum ngă Jơlan hơdră anai.

“Bruă yôm lĕ ngă hiư̆m pă kiăng pơđĭ tui tơlơi thâo hluh, gir ngă pô mơng neh met wa, thâo pơmin hrưn đĭ, ƀu tơguan kơ Kơnuk kơna ôh. Ƀing ta ăt khŏm pơjing rai tơlơi bơkơtưn, jak iâu arăng tuh pơ alin pơkra anih anom, čih pơkra tơlơi pơtrun, biă ñu lĕ pơphun bruă mă. Hơmâo tơlơi pơsur bơwih ƀong, biă ñu lĕ djru kơ ƀing hlăk ai. Yua hnun ƀing ta khŏm pơtô bruă mă lăp djơ̆ amăng rơnuk phrâo 4.0, boh thâo măi mok phrâo mơn”.

Tơlơi kiăng mơng Jơlan hơdră dêh čar pơtrun pơđĭ kyar bơwih ƀong huă - mơnuih mơnam kual mơnuih ƀon sang djuai ƀiă hăng čư̆ siăng rơwang thun 2021-2030 lĕ añip tui tơlơi pleh ploh amăng tơlơi hơdip, prăk pơhrui mơng kual hơmâo mơnuih ƀon sang djuai ƀiă hăng kual čư̆ siăng pơhmu hăng mrô ŭ yap tong krah amăng dêh čar ta; truh thun 2025 hrŏ trun 50% mrô să, plơi pla tơnap tap kơtang, truh thun 2030 ƀu hơmâo dong tah să, plơi pla tơnap tap kơtang.

Tui hăng Kơ-iăng khua dêh čar ơi Trương Hòa Bình, amăng hrơi mông hơmâo klin Covid-19 ngă tơnap kơ tơlơi bơwih ƀong, tơlơi hơdip, Jơlan hơdră dêh čar pơtrun djru kơ mơnuih ƀon sang djuai ƀiă hăng kual čư̆ siăng jing yôm biă mă, ƀrô pơtrut bruă sĭ blơi gơnam, ƀrô djru hơmâo bruă mă, pơkra gơnam, sĭ mơdrô, jing tơlơi yôm kơ bruă djru mơnuih ƀon sang bơwih ƀong, biă ñu hăng ƀing tơnap tap, ƀu hơmâo pô čem rông, sang anŏ tơnap tap ƀơi kual ataih yaih...

Siu H’Mai: Pơblang