VOV4.Jarai-Ƀơi sang jơnum khua pơ ala mơnuih ƀôn sang dêh čar, ơi Vương Đình Huệ git gai jơnum mơ̆ng ataih lăng nao rai hăng tivi Grup sĭ mơdrô dêh čar Mi hăng ASEAN tui hăng tơlơi rơkâo mơ̆ng Khul wai lăng sĭ mơdrô dêh čar Mi hăng ASEAN, dưi pơtruh nao rai hăng 12 boh dêh čar.

Ƀơi mông mă bruă, khua git gai pơ ala mơnuih ƀôn sang dêh čar ơi Vương Đình Huệ, čang rơmang ƀing ngă bruă sĭ mơdrô mơ̆ng dêh čar Mi hăng Khul wai lăng sĭ mơdrô dêh čar Mi–ASEAN kơtưn bưp nao rai djru jơlan hơdră, ƀu kơnong pơsir tơlơi tơnap tap, gun gan hăng tơlơi rơkâo rơđah rơđong đôč ôh, khom bưp pơčrông sai jơlan hơdră ngă hiư̆m pă dua bơnah tŭ yua soh, wơ̆t hăng kơnuk kơna hăng anom bruă sĭ mơdrô hơmâo anŏ tŭ yua hiam klă, bơ mơnuih ƀôn sang hăng mơnuih mă bruă apah pô tŭ mă boh tŭ yua anun ƀơi anăp mơta.

Laih dơ̆ng kơtưn djru pơgôp hiăp kơ hơdră čih pơkra tơlơi phiăn Việt Nam kiăng bơwih brơi tơlơi kiăng amăng bruă mă hơdip mơda ƀơi Việt Nam, laih anun ngă djơ̆ tơhnal pơkă amăng kual hăng jar kmar.

Nay Jek: Pơblang