VOV4.Jarai - Ƀơi anăp kơ tơlơi ngă tơnap tap mơng klin Covid-19, tlam lơ 31/5, Jơnum min mơnuih ƀon sang tơring čar  Lâm Đồng hơmâo hră pơtrun ječ kơ bruă ngă tui khut khăt hơdôm hơdră pơgang klin Covid-19. Jơnum min mơnuih ƀon sang tơring čar  Lâm Đồng rơkâo hơdôm anom bruă, gơnong bruă, khul grup kơđi čar mơnuih mơnam, Jơnum min mơnuih ƀon sang hơdôm tơring glông, plơi prong amăng tơring čar pok pơhai khut khăt hơdôm hơdră pơgang klin Covid-19.

Lâm Đồng kơtưn amăng bruă pơgang klin kơtuai tui jơlan mut nao tơring čar

Amăng anun, rơkâo abih bang mơnuih glăi mơng kual hơmâo klin khŏm pơčlah pơƀut 21 hrơi, dong mơng 5 mông tlam lơ 31/5. Ƀing mơnuih ƀu ngă tui amra phak tui tơlơi pơkă. Kơnong ƀing mơnuih glăi mơng anih glăk guang dar, pơčlah ƀơi ƀôn prong Hồ Chí Minh hăng hơdôm tơring čar Bắc Giang, Bắc Ninh … Mơng lơ 18/5 truh ră anai, kiăng phaih gah ia jrao, kiăo tui lăng drơi jăn pơ sang hăng ƀuăn ƀu tơbiă hyu gah rơngiao lơ̆m aka ƀu pơčlah mă pô 14 hrơi.

Ƀing mơnuih mut nao tơring čar Lâm Đồng lêng kơ phaih gah ia jrao

Hrŏm hăng anun, Jơnum min mơnuih ƀon sang tơring čar Lâm Đồng brơi pơdơi jang jai bruă pơgiăng hyu tuai mơng ƀôn prong Hồ Chí Minh glăi pơ Lâm Đồng. Bruă pơdô̆ rơkơi bơnai, tuh ƀuai, ngui ngor khŏm pơdơi hĭ; mơyut jôk ƀu dưi pơƀut rơgao 30 čô mơnuih hăng ngă tui tơlơi pơkă 5k. Amăng hơdôm hrơi anai, tơring čar Lâm Đồng ƀu brơi ƀing apăn bruă, mơnuih mă bruă tơbiă hyu hơdôm tơring čar pơkŏn.

Siu Đoan: Pơblang