VOV4.Jarai -  Mơguah lơ 1/11, Kơ-iăng Khua dêh čar ta ơi Lê Văn Thành git gai jơnum lăng nao rai mơng ataih kơ tơlơi pok pơhai ngă tui bruă pơsir anih anom mă yua hăng tuh pơplai pơdŏng Rơwang bruă tơdrun dŭ pơgiăng hăng rơdêh por jar kơmar Long Thành (Đồng Nai). Tơlơi lăi pơthâo glăi mơng Ding jum wai lăng jơlan nao rai hăng dŭ pơgiăng dêh čar ta brơi thâo, truh ră anai bruă pơsir anih anom mă yua pơkra amăng mrô 5 rơbâo ektar hmâo pơhrui glăi laih rơbêh kơ 3 rơbâo 800 ektar hmâo giăm truh 77% kơčăo bruă.

Anung prăk pơdŏng pơnăng war guai hmâo 75% mrô bruă. Klah čun bruă jơnum, Kơ-iăng Khua dêh čar ơi Lê Văn Thành brơi thâo anai lĕ rơwang bruă yôm phăn biă ngă tui bruă pơđĭ kyar gơnong bruă jơlan nao rai. Hơdôm Tơlơi pơtrun pơsit mơng Kơnuk kơna leng kơ djơ̆, anai lĕ ring bruă phun hăng khom ngă giong amăng thun 2025. Lom ring bruă ngă giong amra pơjing ƀô̆ mơta phrâo kơ gơnong bruă rơdêh por, plai ƀiă gun găn kơ ƀôn prong Hồ Chí Minh hăng jing pran pơtrut pơđĭ kyar bơwih ƀong mơng đơ đam kual, biă ñu mơng tơring čar Đồng Nai. Yua anun, khom ngă giong djơ̆ rơnoh bruă ba tơbiă. Ƀơi anăp đing nao ngă giong abih bruă čuk pơkra dưm dơ̆ tui hră kač mơng Ding jum wai lăng jơlan nao rai dŭ pơgiăng dêh čar pioh akô̆ blan 1/2022 amra pok phun./.

Siu H’ Prăk: Pô pơblang