VOV4.Jarai-Amăng hră lăi pơthâo phrâo anai mơ̆ng Anom bruă kơnuk kơna, Kơ-iăng Khua dêh čar ơi Lê Minh Khái pơtrun hiăp brơi ngă giong jơlan hơdră djru kơ đah kơmơi, čơđai muai bưp tơlơi tơnap tap yua klin covid 19. Kơnuk kơna pơtrun hiăp kơ Ding jum Bruă mă Tơhan rơka hăng Mơnuih mơnam ngă hrom djop ding jum, anom bruă tañ ngă giong hĭ Hră pơdah thâo hăng Hră pơtrun jơnum mơ̆ng kơnuk kơna pơsit kơ bruă anai.

Kơ jơlan hơdră djru djop pô, sang anŏ bưp tơlơi tơnap yua bơbeč djơ̆ mơ̆ng klin kheng Covid 19 glăi pơ plơi pla hơdip mơda hăng mă bruă, dưi čan prăk bơwih ƀong huă, pơkra ming, sĭ mơdrô, Kơ-iăng khua dêh čar jao kơ Ding jum Man pơphô hăng Tuh pơ alin ngă hrom Ding jum Bruă mă Tơhan rơka hăng Mơnuih mơnam, sang bruă prăk djru mơnuih mơnam tơnap tap hăng lu anom bruă pơkŏn kơsem min lăng, rơkâo lăng abih bang bruă rŭ glăi tơlơi bơwih ƀong huă mơnuih mơnam dêh čar, lăi pơthâo kơ anom bruă hơmâo tơlơi dưi sem glăi hăng pơsit bruă mă.

Nay Jek: Pơblang