VOV4.Jarai - Jơnum min apăn bruă pơ ala mơnuih ƀon sang tơring čar Lâm Đồng tal 10 hơmâo pơphun jơnum lok 4 pơtŏng glăi bruă pơđĭ kyar bơwih ƀong huă - mơnuih mơnam hăng sem lăng, pơsit brơi hơdôm mơta hră pơ-ar tơlơi pơtrun yôm. Tui hăng tơlơi lăi pơthâo glăi ƀơi mông jơnum, mah klin Covid-19 ngă tơnap, samơ̆ tơring čar Lâm Đồng ăt djă bong hnong mơn rơnoh đĭ kyar bơwih ƀong rơbêh 3,1%. Amăng anun, kơnong bruă ngă hmua đĭ kyar 4% hăng măi mok - man pơdong anih anom đĭ 5,5%. Yôm hloh, prăk pơhrui kơ kơnuk kơna hơmâo 10.620 klai prăk, đĭ 12,7% pơhmu hăng tơđar thun hlâo. Khă hnun, Lâm Đồng ăt dŏ 8/18 honong pơkă bơwih ƀong huă - mơnuih mơnam aka ƀu dưi ngă tui hăng tơlơi jao. Bruă pơkra gơnam sĭ mơdrô mơng anom bơwih ƀong bưp tơnap tap biă; bruă tuai hyu čuă ngui pơdơi mơn, ƀu hơmâo prăk pơhrui glăi dong tah; bruă arăng phă glai prai rưng, gô̆ mă lŏn glai ăt dŏ hơmâo, ăt hơmâo mơn bruă arăng kăng lŏn, sĭ lŏn ngă hmua mơ̆ ƀu djơ̆ tơlơi phiăn...

Jơnum lok 4, Jơnum min apăn bruă pơ ala mơnuih ƀon sang tơring čar Lâm Đồng tal 10

Mông jơnum anai tơring čar amra pơƀut pơblang, bơkơtuai hăng ngă rơđah hơđôm bruă, mơng anun hơmâo hơdră pơsir pơplih glăi hăng pơđĭ tui tơlơi bơwih ƀong huă - mơnuih mơnam hăng ngă pơgiong abih hơdôm rơnoh pơkă, bruă mă yôm amăng hrơi blan pơ anăp.

Siu H’Mai: Pơblang