VOV4.Jarai - Khua ding jum ia jrao ơi Nguyễn Thanh Long phrâo pôr pơthâo kơ hơdôm tơlơi bơdjơ̆ nao bruă pơhlôm, pơgang klin Covid-19, biă ñu lĕ ƀơi dua boh tơring čar Bắc Giang hăng Bắc Ninh; laih dong git gai djŏp anom bruă, biă ñu lĕ hơdôm kual kiăng răng kơđiăng hloh, ƀu dưi pơ-ai, ƀu dưi ngă amưng ôh, pơhrui djŏp anom bruă čar hăng mơnuih ƀon sang gum bruă pơgang klin.

Khua ding jum ia jrao ơi Nguyễn Thanh Long.

Tui hăng Khua ding jum ơi Nguyễn Thanh Long, klin Covid-19 amăng tal 4 kơtang hloh, amra sui hloh kơ hơdôm tal hlâo, klin hơđuh ƀơi lu anih, ƀă mơng lu mơnuih, hơmâo lu anih hơmâo klin amăng ha hrơi mông, hơmâo lu djuai virus pơplih phrâo ƀă hyu tañ hloh, kơtang hloh. Khua ding jum ia jrao ơi Nguyễn Thanh Long git gai, amăng hrơi blan pơ anăp, djŏp gưl, anom bruă, biă ñu lĕ hơdôm tơring čar, ƀon prong kiăng pơhŭi kơtang hloh, ƀu dưi pơ-ai ôh, iâu pơthưr abih bang anom bruă čar hăng mơnuih ƀon sang gum pơgang klin.

Siu H’Mai: Pơblang