VOV4.Jarai-Mơguah lơ 1/7, ƀơi tơring čar Hưng Yên pơphun jơnum pôr pơthâo hră pơtrun mơ̆ng Ding jum kơđi čar, jao bruă ngă khua. Ƀơi mông jơnum, ơi Nguyễn Quang Dương, ding kơna apăn bruă ping gah dêh čar Kơ-iăng Khua anom pơphun bruă ping gah dêh čar, lăi pơthâo hră pơtrun mơ̆ng Ding jum kơđi čar, brơi ơi Nguyễn Hữu Nghĩa –Kơ-iăng Khua anom bơwih ƀong ping gah dêh čar ngă hrom khua mua apăn bruă ping gah tơring čar, khua apăn bruă phun ping gah tơring čar Hưng Yên, ngă khua git gai ping gah tơring čar Hưng Yên, rơwang bruă thun 2020-2025.

Hră pơtrun anai, dưi ngă tui mơtam mơ̆ng lơ 15/6/2021. Pơhiăp đĭ amăng mông nao ngă bruă, ơi Nguyễn Hữu Nghĩa-Khua git gai ping gah tơring čar Hưng Yên ƀuăn amra gir run abih pran jua pô, hrom hăng ƀing ding kơna apăn bruă phun, ding kơna apăn bruă ping gah tơring čar Hưng Yên, git gai bruă mă hrom hăng mơnuih ƀôn sang amăng tơring čar ngă tui djơ̆ tơhnal pơtrun jơnum ping gah tơring čar rơwang bruă tal XIX rơwang thun 2020-2025; akŏ pơdong ping gah, anom bruă kơđi čar dưi hơđong kjăp; akŏ pơdong plơi pla tơring čar Hưng Yên pơđĭ kyar pơdrong asah.

Nay Jek: Pơblang