VOV4.Jarai-Tlam lơ 11/6, ƀơi sang bruă kơnuk kơna, git gai jơnum lăng nao rai amăng tivi kơplah wah Khul khua git gai mơ̆ng dêh čar pơhlôm pơgang klin Covid 19 hăng hơdôm tơring čar, ƀôn prong hơmâo anom tuh tia pơkra pơjing sa ƀut, kiăng kah pơpha tơlơi thâo thăi bruă pơhlôm, pơgang klin amăng sang măi, sang bruă tuh tia pơkra pơjing sa ƀut lu mơnuih dŏ mă bruă, Kơ-iăng khua dêh čar ơi Vũ Đức Đam, Khua khul git gai pơtă pơtăn, djop tơring čar gir run anăm lui klin ƀă amăng anih lu mơnuih dŏ; tơdah hơmâo mơnuih ƀă laih Covid 19 amăng kual tuh tia pơkra pơjing, khom ƀuh tañ amăng 3 hrơi blung a.

Ƀơi mông jơnum khua mua djop tơring čar Bắc Ninh, Bắc Giang, Hà Nội, Bình Dương, Long An, Tây Ninh, Bà Rịa Vũng Tàu hăng ƀông prong Hồ Chí Minh lêng kơ bơngơ̆t soh kơ tơlơi hơmâo klin Covid 19 ƀă truh pơ sang măi anih lu mơnuih dŏ mă bruă. Klin hơđuh glăi tal 4 anai him lăng ƀing ƀă laih mơ̆ng hlâo adih, yua lu mơnuih jĕ giăm nao rai.

Khul khua mua git gai mơ̆ng dêh čar pơtrun hiăp hơdôm tơring čar, ƀôn prong anun anăm ngă amưng ôh, khom ĕp lăng na nao, sem lăng ngă tui hơdră pơhlôm, pơgang klin, khom ngă tui 5 mơta tơlơi pơtrun pơgang klin, boh nik ñu truă bơnal gôm mơdung amăng bah sit tơbiă mơ̆ng sang anŏ, anăm dŏ pơtum lu mơnuih ôh.

Nay Jek: Pơblang