VOV4.Jarai - Čơtlăm lơ 28/12, Kơ-iăng Khua dêh čar ơi Lê Văn Thành hmâo pel ĕp anih anom hăng mă bruă hăng tơring čar Lâm Đồng hrom hăng hơdôm ding jum, gơnong bruă bơdjơ̆ nao kơ tơlơi prăp lui tuh pơplai Rơwang bruă jơlan đuăi hmar črăn Tân Phú (Đồng Nai) – Bảo Lộc (Lâm Đồng) hăng Bảo Lộc – Liên Khương.

Rơwang bruă jơlan đuăi hmar Tân Phú – Bảo Lộc hmâo jơlan ataih 66km, amăng anun 11km gah tơring čar Đồng Nai hăng 55km gah Lâm Đồng. Anai lĕ sa amăng 3 rơwang bruă mơng Rơwang bruă jơlan đuăi hmar Dầu Giây – Liên Khương. Rơwang bruă dưi pơpha tal tuh pơplai 2 tal, pơkă hlâo ngă giong hăng mă yua amăng thun 2025. Pơhiăp amăng mông mă bruă, Kơ-iăng Khua dêh čar ta ơi Lê Văn Thành pơsit yôm bruă tơring čar Lâm Đồng hmâo gơgrong hlâo ngăn rơnoh mơnuih mơnam mơng hơdôm anom bơwih ƀong hăng sa črăn ngăn rơnoh mơng tơring čar, ƀu mă yua ngăn drăp kơnuk kơna lom tuh pơplai rơbêh kơ 140 km jơlan đuăi hmar. Hrom hăng anun, rơkâo hơdôm ding jum, gơnong bruă bơdjơ̆ nao đing nao djru hơdôm tơring čar pơtlaih tơlơi tơnap, ngă giong hơdôm hră pơ-ar tui tơlơi pơkă kiăng tañ ngă tui, mă yua hơdôm črăn jơlan đuăi hmar djơ̆ tui kơčăo bruă./.

Siu H’ Prăk: Pơblang