VOV4.Jarai - Mơguah lơ 6/12, ƀơi sang bruă Kơnuk kơna, Khua apăn bruă Ping gah, Kơ-iăng khua dêh čar ơi Lê Minh Khái hơmâo mông tŭ jum ơi Choi Joo Ho, Khua prong anom bơwih ƀong Samsung Việt Nam. Lăi nao tơlơi rô nao rai klă hiam ră anai kơplah wah dua boh dêh čar Việt Nam - Hàn Quốc, biă ñu amăng bruă bơwih ƀong, sĭ mơdrô nao rai dua bơnah, mơnuih mă bruă, ODA, amăng abih bang tơlơi dưi ngă anun, hơmâo tơlơi pơgôp prong mơng anom bơwih ƀong dua boh dêh čar, biă ñu lĕ Samsung - anom bruă tuh pơ plai mơng čar rơngiao prong hloh ƀơi Việt Nam, Kơ-iăng khua dêh čar ơi Lê Minh Khái lăng yôm biă hơdôm tơlơi dưi ngă amăng bruă pơkra gơnam, sĭ mơdrô mơng Samsung ƀơi Việt Nam, biă ñu amăng hrơi glăk hơmâo klin Covid-19 kơtang, hơdôm bruă pơkra gơnam sĭ mơdrô mơng Samsung lêng đĭ soh pơhmu hăng tơđar thun hlâo. Khua Anom bơwih ƀong Samsung Việt Nam Choi Joo Ho brơi thâo, truh mông anai, grup bơwih ƀong hơmâo tuh pơ plai pơ Việt Nam abih tih ñu 17 klai 740 klăk dolar Mi, mrô prăk brơi mă yua 100% amăng mrô hơmâo rơkâo tuh pơ plai.

Siu H’Mai: Pơblang