VOV4.Jarai - Mơguah lơ 24/10, ƀơi tơring čar Quảng Ninh, Kơ-iăng khua dêh čar ơi Lê Văn Thành hrŏm hăng grup khua mơng Kơnuk kơna hơmâo mông ngă bruă hăng Grup pơkra Hơdăng pơtâo Việt Nam kơ bruă sĭ mơdrô, tơlơi hơdip mơng ƀing kông ñơn hăng mơnuih mă bruă mơng grup anai. Grup pơkra Hơdăng pơtâo Việt Nam hơmâo pơkra ƀơi rơbêh 4 mơta bruă phun anun lĕ: pơkra hơdăng, apui lơtrik, pơtâo čuah, pơkra gơnam ngă pơtuh, hăng prăk pơhrui glăi rim thun rơbêh 130 rơbâo klai prăk. Ƀơi anăp tơlơi tơnap mơng klin Covid-19 samơ̆ Grup bơwih ƀong ăt ngă klă dua mơta tơlơi kơnuk kơna jao, prăk pơhrui glăi truh mông anai hơmâo rơbêh 96 rơbâo klai prăk; pơhlôm ba bruă mă hăng prăk blan kơ 95 rơbâo čô mơnuih. Pơhiăp ƀơi mông ngă bruă, Kơ-iăng khua dêh čar ơi Lê Văn Thành lăi, Anom bruă kiăng khŏm pơgăn glăi yơh hăng tơlơi tơnap tap tơlơi lông amăng hrơi blan pơ anăp kah hăng: Bruă mă hơdăng pơtâo, bruă tuh pơ plai ăt dŏ kaih mơn pơhmu hăng tơlơi pơkă; bruă wai lăng rơnuk rơnua ăt dŏ amuñ hơmâo lu tơlơi truh mơn. Kiăo tui anun, Kơ-iăng khua dêh čar kiăng anom bruă pơkra hơdăng pơplih phrâo klă hloh Anom bruă, pơđĭ tui gơnam hơmâo pơkra, klă hloh, tŭ yua hloh, kơtưn pơhnô hrŏm anom bruă pơkŏn.

Siu H’Mai: Pơblang