VOV4.Jarai - Tlam lơ 29/12, Kơ-iăng khua dêh čar ơi Lê Minh Khái pơhmư̆ mông Jơnum pok pơhai bruă mă mơng sang bruă prăk thun 2022. Kơ-iăng khua dêh čar bơni biă kơ sang bruă prăk amăng thun laih rơgao pioh rơbêh 5 rơbâo klai prăk djru ba bruă wai lăng mơnuih tơnap tap, amăng anun brơi rơbêh 3 klai 200 klăk prăk djru kơ bruă pơgang klin Covid-19. Amăng thun phrâo 2022, Kơ-iăng khua dêh čar kiăng sang bruă prăk pơhrŏ trun dong mơn kơmlai čan, biă ñu ƀơi hơdôm bruă hơmâo kơnuk kơna kiăng djru.

Kơ-iăng khua dêh čar ơi Lê Minh Khái pơhiăp ƀơi mông jơnum.

Pơđĭ tui anŏ klă mơng bruă čan prăk kăk, pơƀut prăk čan gah bruă bơwih ƀong sĭ mơdrô, pơđĭ kyar anih anom. Pok pơhai klă jơlan hơdră brơi prăk čan kơ ƀing hơmâo anăn kơnuk kơna djru, djru ba mơnuih ƀon sang, anom bơwih ƀong tơnap tap. Kơ-iăng khua dêh čar ơi Lê Minh Khái ăt git gai sang bruă prăk pơtrut pơđĭ kyar bruă brơi prăk čan blơi gơnam yua, ngă plai ƀiă arăng čan prăk kơmlai lu hăng kiăng huăi hơmâo ƀing ngă soh brơi čan prăk tui glông măi internet rơnuk anai.

Siu H’Mai: Pơblang