VOV4.Jarai-Kơ-iăng Khua dêh čar ơi Lê Văn Thành git gai jơnum lăng nao rai amăng tivi hăng bruă pơsir tơlơi gun tơnap kơ anom bruă sĭ mơdrô ƀơi anih tuh tia pơkra ming, bơwih ƀong huă, anih mă yua boh thâo ia rơgơi hăng ƀut anih tuh tia pơkra ming, pơphun jơnum lơ 20/9 ƀơi Hà Nội. Tui hăng Ding jum Man pơphô hăng Tuh pơ alin, klin kheng covid 19 tơnap tap, sui blan, ngă răm ƀăm prong kơ lu anom bruă sĭ mơdrô, kơ mơnuih ƀôn sang.

Lu sang bruă sĭ mơdrô, anom bruă pơkra ming, gơnam sĭ mơdrô, mơnuih mă bruă apah, lu sang bruă khom lui abih hră pơar pơkôl pơkă sĭ mơdrô, jing hĭ anom bruă dong hnưh ƀu anăm tla prăk čan, bơbeč djơ̆ tơlơi hơdip mơda mơnuih mă bruă lu biă mă…Kiăng pơsir tơlơi tơnap tap anai, rŭ glăi bơwih ƀong huă sĭ mơdrô, lu anom bruă sĭ mơdrô rơkâo kơnuk kơna sem glăi, pơkra hơdră pơkra ming sĭ mơdrô tŭ yua hloh, djơ̆ hăng tơlơi gêh găl phara; tŭ ư brơi anom bruă sĭ mơdrô pơphun glăi bruă mă pơkra ming sĭ mơdrô djơ̆ găl tui sang bruă.

 Laih dơ̆ng rơkâo djop tơring čar, ƀôn prong anăm ngă tui tŭ kơ hơmâo ôh hơdră pơhlôm, pơgang klin, ngă tơnap kơ anom bruă sĭ mơdrô sit tơbiă hyu mă bruă pơkra ming pơdŭ pơgiăng gơnam ƀudah ngă tơnap kơ mơnuih mă bruă apah lơ̆m pơwơ̆t glăi mă bruă.

Nay Jek: Pơblang