VOV4.Jarai - Anom bruă Kơnuk kơna hmâo hră pơ-ar lăi pơthâo tơlơi gum pơhiăp mơng Kơ-iăng Khua dêh čar ơi Lê Văn Thành kơ bruă ngă gal brơi tơlơi dŭ pơgiăng gơnam tam amăng tơlơi klin Covid-19 ngă. Kiăo tui anun, Kơ-iăng Khua dêh čar ta črâo ba: Ƀu pel ĕp ƀơi hơdôm anih pel ĕp klin hăng rơdêh hmâo hră pơsit hmâo QR Code dô̆ hrơi blan mă yua, yua kơ Gơnong bruă jơlan nao rai dŭ pơgiăng pơsit brơi pơgiăng gơnam tam pioh man pơdŏng, bơwih ƀong, sĭ mơdrô, sĭ blơi gơnam hăng dêh čar tač rơngiao, blơi yua (rơngiao kơ hơdôm gơnam kom pơkra, sĭ mơdrô tui tơlơi pơkă) amăng abih bang hơdôm ară jơlan đuăi hmar, jơlan amăng lŏn ia, tơring čar, jơlan amăng tơring glông, jơlan ƀơi plơi prong amăng đơ đam dêh čar ta. Tơdah rơdêh ƀu hmâo hră pơsit QR Code ƀudah hmâo samơ̆ abih hrơi pơkă lĕ pel ĕp lăi pơthâo gah ia jrao hăng hră tŭ yap bôh tơhnal pơčrang hăng Sars-CoV-2 hăng mơnuih amăng rơdêh. Ƀơi hơdôm kual hmâo klin, hơdôm bôh tơring čar ƀôn prong gơgrong hlâo hmâo pơpha jơlan nao, pơphun bruă nao rai djơ̆ rơ-oa kiăng hơdư̆ ƀiă rơdêh mut nao amăng krah plơi prong pioh pơgang, pơgăn klin ruă samơ̆ khom pơhlôm bruă dŭ pơgiăng, rô nao rai, pơpha hyu gơnam hluh gah ƀơi anih anom găn nao./.

Siu H’ Prăk: Pô pơblang