VOV4.Jarai-Mơguah lơ 22/12, ding kơna ding jum kơđi čar, Kơ-iăng Khua dêh čar ơi Phạm Bình Minh hrom hăng grup hyu mă bruă nao čuă, ƀơk gơnam hăng bơni hơơč hrơi Noel ƀơi sang khua ơi khop Huế; čuă jơmư hăng bơni hơơč Noel kơ anih tơring đăo khop Phù Cam Huế.

Pơ ala kơ ping gah hăng kơnuk kơna, Kơ-iăng Khua dêh čar ơi Phạm Bình Minh pơpŭ tơlơi suaih pral, ƀơk gơnam hăng brơi guang bơnga bơni hơơč hrơi Noel kơ ơi khop Nguyễn Chí Linh, Khua wai lăng sang ơi adai khop Huế, Khua khul ơi khop Việt Nam; pơpŭ kơ khua mua đăo khop hăng abih bang mơnuih ƀôn sang ƀing djru đăo khop ƀơi Huế hok mơak amăng sa bơyan Noel rơnuk rơnua hăng čơkă thun phrâo mơak mơai.

Laih dơ̆ng, čang rơmang ƀing khua ơi khop ăt pơđĭ tui pran jua khăp kơ lŏn ia, hrom hăng djuai ania, pơđĭ tui boh tơhnal dưi ngă laih, tơlơi glăm ba, djru hrom lu hloh amăng bruă mă man pơdong lŏn ia Việt Nam yua kơ kiăng mơnuih ƀôn sang pơdrong asah, lŏn ia kơtang, mơnuih ƀôn sang ngă khua pô, bơkơnar hăng thâo rơgơi.

Nay Jek: Pơblang