VOV4.Jarai - Lơ 15/11, Kơ-iăng khua dêh čar ơi Phạm Bình Minh bưp kư tri ƀơi tơring glông Long Điền hăng tơring glông Đất Đỏ tơring čar Bà Rịa - Vùng Tàu. Kơ-iăng khua dêh čar ơi Phạm Bình Minh lăi pơhmư̆ kơ ƀing kư tri kơ mông jơnum lok 2, Khua git gai pơ ala mơnuih ƀon sang dêh čar tal 15 hơmâo pơphun truh kih tui akŏ bruă blung a. Kơ-iăng khua dêh čar ăt lăi pơhmư̆ kơ ƀing kư tri hơdôm tơlơi pơplih hiam amăng bruă sĭ mơdrô gơnam kơ čar rơngiao hăng tuh pơ plai bơwih ƀong đĭ glăi. Laih dong brơi thâo Kơnuk kơna glăk gir pơhlôm hơmâo djŏp vaccine pơgang Covid-19 amăng đơr hơr anih, kơnong ƀơi Bà Rịa - Vũng Tàu hơmâo brơi 1 klăk 800 rơbâo liêu. Tơdơi kơ mông bưp kư tri, pơ ala kơ Khua mua amăng Kơnuk kơna, Kơ-iăng khua dêh čar ơi Phạm Bình Minh nao čuă, juh alum hăng brơi gơnam kơ 7 boh sang anŏ hơmâo tơlơi gum djru prong amăng bruă bơkơtưn khăp kơ lŏn ia, iâu pơthưr mơnuih ƀon sang pơgang klin Covid-19 mơng dua boh tơring glông Long Điền hăng Đất Đỏ. Laih dong, ƀing khua ăt nao čua jơmư, rơngôt hrŏm, hăng brơi 25 anung gơnam kơ hơdôm boh sang anŏ hơmâo mơnuih djai yua klin Covid-19.

Siu H’Mai: Pơblang