VOV4.Jarai-Klăm mơmŏt lơ 21/11, ƀơi Hà Nội, Jơnum min rơnuk rơnua jơlan glông dêh čar jơnum ngă lơphet h’ŭ kơ ƀing djai rơdêh pơjrom. Nao jơnum hrom, hơmâo kơ-iăng khua dêh čar ơi Phạm Bình Minh. Hăng boh pia “Hơdor h’ŭ kơ mơnuih đuăi nao-Yua kơ mơnuih dŏ glăi”, anai lĕ thun tal 10 jơnum tơlơi anai ƀơi Việt Nam hăng thun tal 2 Jơnum min rơnuk rơnua jơlan glông dêh čar pơphun hơdră “Gơyut jơlan glông” hăng ngă lơphet h’ŭ kơ mơnuih djai yua rơdêh pơjrom.

Đĭ pơhiăp ƀơi mông jơnum hơdor kơ ƀing djai yua rơdêh pơjrom, Kơ-iăng khua dêh čar ơi Phạm Bình Minh iâu pơthưr mơnuih ƀôn sang sa pran jua ngă tui djơ̆ Tơlơi phiăn rơnuk rơnua jolan glông kiăng huăi hơmâo tơlơi truh sat ruă pran jua. Jơnum ngă lơphet hơdor kơ ƀing djai yua rơdêh pơjrom dưi pơphun rĭm thun, kiăng juh alum sang anŏ hơmâo mơnuih djai laih anun pơtă pơtăn kơ mơnuih dŏ hơdip khom kơđiăng sit rô nao rai amăng jơlan glông, pơgang tơlơi hơdip kơ ta pô hăng mơnuih pơkŏn.

Nay Jek: Pơblang