VOV4.Jarai - Tlam lơ 27/7, ƀơi Hà Nội, Ding kơna ding jum kơđi čar, Kơ-iăng khua dêh čar ơi Phạm Bình Minh nao pơhmư̆ mông jơnum prong lăng nao rai amăng tivi prăp lui kơ mông Jơnum khua mua pơprong kơ bruă Braih apiăng gơnam ƀong huă thun 2021 (UNFSS) laih anun hơmâo đĭ pơhiăp ƀơi mông jơnum anai. Mông jơnum anai kiăng ĕp hơdră ngă bruă phrâo djru bruă wai lăng braih apiăng, pơtrut pơplih phrâo hăng tơlơi ngă hrŏm mơng anom bơwih ƀong, anom bruă tuh pơ alin bruă čar hăng tuh pơ alin ngă mă pô kiăng krăp lăng pơtô ba bruă pơplih phrâo anai. Jơnum lui hlâo prăp kơ mông Jơnum prong bruă Braih apiăng rŏng lŏn tơnah hơmâo pơphun ƀơi Anom bruă wai lăng Braih apiăng hăng Bruă ngă hmua Sang gum hơbit djŏp dêh čar (FAO) ƀơi plơi prong jưh jom Rome, Italia lăng nao rai mơng ataih amăng tivi. Pơphun amăng 3 hrơi mơng lơ 26 truh 28/7, jing tơlơi jơnum prăp lui kơ mông Jơnum khua mua pơphun sit nik, him lăng hơmâo pơphun ƀơi Sang gum hơbit djŏp dêh čar ƀơi New York, dêh čar Mi amăng blan 9 pơ anăp.

Siu H’Mai: Pơblang