VOV4.Jarai - Mơguah lơ 27/12, Ding jum wai lăng jơlan nao rai dŭ pơgiăng dêh čar ta gum hrom hăng Jơnum min mơnuih ƀôn sang tơring čar Lai Châu pơphun ngă Lơphet pơdŏng pơkra Rơwang bruă tô jơlan nao rai hơdôm bôh tơring čar kual čư̆ siăng Pơngŏ dêh čar ta.

Rơwang bruă hmâo abih bang prăk mă yua rơbêh kơ 5.300 klai prăk, djru ngă ƀiă mông nao rai mơng kual krah hơdôm bôh tơring čar Lai Châu, Lào Cai, Yên Bái hăng hơdôm anih anom pơkon hmâo bơdjơ̆ nao glăi pơ̆ plơi prong jưh jom Hà Nội. Pơhiăp amăng mông ngă lơphet, Kơ-iăng Khua dêh čar ta ơi Phạm Bình Minh pơsit bruă mă mơng rơwang bruă amăng glông tô nao rai jơlan glông, pơtrut pơđĭ kyar bơwih ƀong – mơnuih mơnam kơ hơdôm tơring čar hmâo rơwang bruă hăng wot kual Yŭ Pơngŏ. Kiăng rơwang bruă dưi ngă tui pơhlôm rơnoh, Kơ-iăng Khua dêh čar ta rơkâo Khua Ding jum wai lăng jơlan nao rai dŭ pơgiăng, Grŭp wai lăng rơwang bruă 2 khom lăng tui, git gai khop, wai lăng anô̆ kơjăp, rơnoh bruă, prăk yua man pơkra jơlan lom pơkra jơlan, pơhlôm kơjăp, djơ̆ tơlơi phiăn./.

Siu H’ Prăk: Pơblang