VOV4.Jarai - Tơdơi kơ hơmâo tơlơi pơsit pơčlah mơnuih mơnam ƀơi ƀôn prong Hồ Chí Minh tui tơlơi črâo trun mrô 15 hăng kuận Gò Vấp, phường Thạnh Lộc ƀơi kuận 12 tui tơlơi črâo trun mrô 16 mơng Khua dêh čar ta, mơguah lơ 31/5, Kơ-iăng khua dêh čar ơi Trương Hòa Bình hơmâo nao pel ĕp bruă pơgang klin Covid-19 amăng ƀôn prong.

Kơ-iăng khua dêh čar ta ơi Trương Hòa Bình hiăp bit hăng kông nhơn

Kơ-iăng khua dêh čar ta ơi Trương Hòa Bình hơmâo nao pel ĕp bruă pơgang klin ƀơi 3 boh kông ti anun lĕ hơdôm sang măi pơkra pơjing Tân Thuận (kuận 7): Kông ti TNHH MTex Việt Nam, kông ti TNHH Kim May Organ Việt Nam hăng Kông ti TNHH Nikiso Việt Nam. Tơdơi kơ pel ĕp sit nik ƀơi 3 kông ti amăng grup sang măi pơkra pơjing Tân Thuận, kơ-iăng khua dêh čar ta hrŏm hăng grup hyu mă bruă nao pel ĕp bruă pơgang klin ƀơi anih pơčlah lĕ sang hră gưl prong ƀôn prong Hồ Chí Minh. Anai lĕ sa amăng hơdôm anih pơčlah prong hloh ƀơi sang hră gưl prong, cao đẳng amăng ƀôn prong Hồ Chí Minh mă yua kiăng kơ pioh pơčlah mơnuih jê̆ giăm hăng ƀing ƀă virus Sars-Cov2.

Siu Đoan: Pơblang