VOV4.Jarai-Lơ 28/7, Kơ-iăng Khua dêh čar ơi Vũ Đức Đam nao ĕp lăng bruă mă pơhlôm, pơgang klin Covid 19 ƀơi tơring čar Long An. Kơ-iăng Khua dêh čar ơi Vũ Đức Đam hăng grup nao mă bruă ĕp lăng, čuă jơmư hăng pơtrut pran jua ƀing khua mua, mơnuih mă bruă amăng sang ia jrao hlăk dŏ mă bruă pơjrao mơnuih duăm ruă ƀơi anih pơjrao sang ia jrao tơhan jăng jai mrô 2, tơring glông Tân Trụ, sang ia jrao tơhan jăng jai ƀơi sang hră kơđi čar Long An hăng hơdôm anih anom pơjrao amăng tơring čar Long An.

Tui hăng tơlơi lăi pơthâo, tơring čar Long An hơmâo 16 boh anih ngă tui bruă mă pơjrao duăm ruă hăng pơčlah mơnuih ƀă kman F0 hăng abih bang 5.070 boh sưng đih. Kiăng pel ĕp, pơgăn klin tañ hloh, yap mơ̆ng lơ 27/7 Long An hơmâo ngă tui hơdră pơgăn mơnuih ƀôn sang tơbiă pơ rơngiao. Pơ anăp anai, Long An ăt ngă tui khut khăt, kơtang hloh, djop hơdră pơtrun tui hră pơčrâo mrô 16 mơ̆ng Khua dêh čar.

Nay Jek: Pơblang