VOV4.Jarai - Tlam lơ 12/7, jơnum lăng nao rai amăng tivi hăng 12 boh tơring čar kual lŏn dăo ia krông Cửu Long kơ bruă pơhlôm pơgang klin Covid-19, Kơ-iăng khua dêh čar ơi Vũ Đức Đam, Khua git gai bruă Dêh čar kiăng hơdôm boh tơring čar amăng kual kiăng prăp lui hơdră pơgang klin kơtang hloh sa hơnong, amăng anun lăng glăi abih mơnuih pơčrang kman, mrô ia khak ia dung hơmâo ba pơčrang, tơlơi rơgơi pơčrang kman mơng ơi ia jrao, anih pơjrao. Ƀơi mông jơnum, khua mua hơdôm boh tơring čar Tiền Giang, Bến Tre, Hậu Giang, Sóc Trăng, Đồng Tháp, Vĩnh Long, Trà Vinh, An Giang, Kiên Giang, Cà Mau, Bạc Liêu, Cần Thơ lăi pơthâo glăi klin Covid-19 ră anai ƀơi tơring čar gơñu. Tui anun, mrô mơnuih ƀă kman SARS-CoV-2 jai hrơi lu tui, lêng kơ ƀă mơng ƀon prong Hồ Chí Minh. Hơdôm boh tơring čar ăt lăi mơn tơlơi tơnap amăng bruă pơgang klin. Ơi Vũ Đức Đam lăi kiăng pôr pơhing, jak iâu mơnuih ƀon sang mơng ƀon prong Hồ Chí Minh glăi khŏm pơhaih pơ sang ia jrao, čih anăn hăng krăp lăng, kiăo tui hră pơčrang kman đah mơng hơmâo hơdră pơgang lăp djơ̆. Kơ-iăng khua dêh čar kiăng ƀon prong Cần Thơ, anih hơmâo Sang hră Đại học Y dược, sang ia jrao prăp lui kơjăp djru kơ hơdôm boh tơring čar amăng kual. Ding jum ia jrao pơhlôm hơmâo măi pơčrang kman kơ hơdôm boh tơring čar kual lŏn dăo ia krông Cửu Long.

Siu H’Mai: Pơblang