VOV4.Jarai-Mơguah lơ 27/5, ƀơi anom bruă Kơnuk kơna, Kơ-iăng Khua dêh čar ơi Vũ Đức Đam, Khua khul git gai mơ̆ng dêh čar kơ bruă pơhlôm pơgang klin Covid 19, jơnum lăng nao rai amăng tivi hăng khua mua ƀôn prong Hồ Chí Minh kơ tơlơi pơhing klin Covid 19 hơđuh rai kơtang.

Kơ-iăng Khua dêh čar ơi Vũ Đức Đam jơnum lăng nao rai amăng tivi

hăng ƀôn prong Hồ Chí Minh

Yap truh 10 mông mơguah lơ 27/5, ƀôn prong Hồ Chí Minh čih pioh hơmâo hơdôm čô mơnuih ƀă kman klin yua pơdjơ̆ nao ƀing đăo ơi anăn Khul pơtô đăosang ơi adai Phục Hưng, pơđĭ tui mrô ƀă truh kơ 25 čô.

Tơdơi kơ ƀuh anih ƀă phrâo, ƀing tơhan djop sang bruă kơnuk kơna pơphun brơi dŏ pơčlah, guang dar mơtam. Ră anai, hơmâo pơtong laih 70 čô mơnuih jĕ giăm ƀing ƀă klin hăng jing F1 336 čô ƀing jĕ giămg hăng ƀing jĕ giăm jing F2. Ƀơi mông jơnum, Kơ-iăng Khua dêh čar ơi Vũ Đức Đam pơtrun hiăp ƀôn prong HCM khom pơphun mă hơdră pơhlôm pơgang djơ̆ găl, kiăng djru hơdôm tơlơi hơgĕt lĕ rơkâo hăng Kơnuk kơna, hơdôm ding jum, anom bruă gơnong dlông ngă hrom.

Lăi pơtong, ƀôn prong HCM jing anih phun tơkuh nao rai djop jơlan glông, anih sĭ mơdrô prong, Ding jum wai lăng jơlan glông hăng pơdŭ pơgiăng tŭ ư hăng hơdră ƀơi anăp mơta brơi kơ ƀôn prong anai rơdêh por nao rai djru mơnuih ƀôn sang glăi pơ Việt Nam aka pơgiăng nao pơ ƀôn prong Hồ Chí Minh ôh.

Nay Jek: Pơblang