VOV4.Jarai - “Tây Ninh kơtưn pel ĕp guang dar hơdôm kual amuñ  lar hyu klin, tañ wai kjăp hơdôm kual huăi hơmâo klin, kiăng mơnuih ƀon sang dưi pot glăi hơdip tui hơđăp”. Anai lĕ hơdôm tơlơi rơkâo mơng Kơ-iăng Khua dêh čar ơi Vũ Đức Đam, Khua khul git gai dêh čar pơgang klin Covid-19 amăng mông mă bruă hăng tơring čar Tây Ninh kơ bruă pơgang klin ră anai. Mơng hrơi hơđuh đĭ klin Covid-19 truh ră anai, tơring čar hơmâo 3 rơbâo 296 čô mơnuih ƀă klin. Ră anai, tơring čar hơmâo 2 kual amuñ lar hyu klin anun lĕ plơi prong Trảng Bàng hăng tơring glông Dương Minh Châu. Hluai tui hrơi glăk ngă tui tơlơi črâo trun mrô 16, tơring čar hơmâo kiăo tui ĕp, pơčrang lăng raih daih sa, dua bit anih kiăng kơ pok prong kual huăi hơmâo klin, guang dar pơčrang lăng djop anih, pơgăn ƀu brơi klin lar hyu kual pơkŏn dong. Ră anai, Tây Ninh glăk gơgrong amăng pơjing hơdră pơjrao mơng 5000 - 10.000 čô mơnuih ƀă klin mơ̆ ăt kiăng hơmâo hơdră pơjrao brơi lăp djơ̆. Amăng anun, pơdong 5 boph sang ia jrao pơjrao mơnuih ƀă klin.

Siu Đoan: Pơblang