VOV4.Jarai- Ding jum wai lăng jơlan glông, gơnong bruă rơdêh por hăng djop ding jum, gơnong bruă bơdjơ̆ nao lăi pơthâo khua mua, pơtrut tañ bruă pok jơlan por pơgiăng tuai amăng jar kmar, djơ̆ hăng tơlơi pơkă kiăng mơnuih ƀon sang Việt Nam dŏ pơ tač rơngiao  dưi glăi pơ dêh čar, bruă anai kiăng pơsir tañ hăng gêh gal hloh tui tơlơi kiăng mơng mơnuih ƀon sang. Anai lĕ tơlơi rơkâo mơng Kơ-iăng khua dêh čar ơi Vũ Đức Đam, Kơ-iăng Khua khul git gai dêh čar amăng pơgang klin Covid-19 amăng mông mă bruă hăng Ding jum ia jrao hăng sa, dua boh ding jum, gơnong bruă bơdjơ̆ nao kơ bruă mơnuih ƀon sang Việt Nam, mơnuih tač rơngiao kiăng mut rai dêh čar Việt Nam pơphun amăng tlam lơ 8/12. Tui tơlơi pơgôp hiăp mơng djop ding jum, gơnong bruă, Kơ-iăng Khua dêh čar ơi Vũ Đức Đam lăi pơtong: rơngiao kơ bruă čơkă ƀing rơgơi kơhnâo, ƀing kỹ sư, mơnuih mă bruă mơng tač rơngiao, tuai mơng tač rơngiao kiăng pơđĭ kyar bơwih ƀong huă-mơnuih mơnam, djop ding jum, gơnong bruă kiăng đing nao bruă ba glăi mơnuih ƀon sang Việt Nam glăk mă bruă, hrăm hră, nao čuă sang anŏ đom glăi pơ dêh čar tač rơngiao dong mơng hrơi klin hơđuh đĭ, kah hăng mơnuih ƀon sang Việt Nam dŏ hơdip pơ tač rơngiao dưm tŭ mă hơdră bruă kơ mơnuih ƀon sang Việt Nam tui tơlơi pơkă.

Siu Đoan: Pơblang