VOV4.Jarai - Mơguah lơ 1/12, ƀơi Hà Nội pơphun Jơnum Khua pơ ala đơ đam dêh čar ta Khul pơsur bruă hrăm hră dêh čar Việt Nam tal 6 hăng hơdor glăi 25 thun hrơi pơdŏng Khul. Kơ-iăng Khua dêh čar ta, ơi Vũ Đức Đam nao pơhmư̆. 25 thun rơgao, Khul ƀu pơdơi pơplih phrâo, iâu pơhrui djop ngăn rơnoh pơđĭ kyar Keh prăk pơsur hrăm hră, ƀơk hơdôm klăk anung prăk pơsur hrăm hră kơ čơđai muai, ƀing nai pơtô čơđai hăng čơđai sang hră, djru čơđai sang hră ƀun rin hrưn đĭ hrăm dlông hloh klă hloh. Amăng mông jơnum, Kơ-iăng Khua dêh čar ta, ơi Vũ Đức Đam lăi rơđah, hơdôm hrơi rơgao, bruă pơtô pơhrăm ƀơi hơdôm gưl hrăm amăng ƀrư̆ dưi pơplih ƀơi rŏng lŏn tơnah, tơlơi anun brơi ƀuh abih bang Ping gah hăng mơnuih ƀôn sang hmâo đing nao bruă hrăm hră. Kơ-iăng Khua dêh čar ta, ơi Vũ Đức Đam rơkâo: Khul pơsur bruă hrăm hră Việt Nam gum hrom hăng hơdôm Ding jum ngă giong hơdôm jơlan hơdră kiăng ngă tui pơplih phrâo abih bang bruă pơtô pơhrăm mơ̆ Ping gah hmâo ba tơbiă. Kơ-iăng Khua dêh čar ta, ơi Vũ Đức Đam đăo gơnang hăng tơlơi tŭ mă hăng pơđĭ kyar, Khul amra prong kơtang hăng djru yôm phăn amăng bruă pơdŏng hăng pơgang lŏn ia./.

Siu H’ Prăk: Pô pơblang