VOV4.Jarai -  Git gai jơnum ječ lăng nao rai mơng ataih bŏng glăi hăng kơthel tal 6 pơphun amăng čơtlăm lơ 23/9 ƀơi ƀôn prong Hà Nội, Kơ-iăng Khua dêh čar ta ơi Lê Văn Thành – Khua Grŭp črâo bruă pơgang, pơgăn ayuh hyiăng ƀu klă ngă dêh čar ta – Khua Jơnum min lŏn ia ta bŏng glăi hăng tơlơi ayuh hyiăng ngă hăng hyu ĕp mơnuih hmâo tơlơi truh rơkâo, hơdôm bôh tơring čar, ƀôn prong ƀu dưi lui raih ôh amăng bŏng glăi, khom pơhlôm kơ tơlơi hơdip mơnuih ƀôn sang biă ñu amăng tal klin Covid-19 ngă tơnap ră anai. Tơlơi lăi pơthâo glăi mơng Grŭp črâo bruă pơgang pơgăn ayuh hyiăng ƀu klă ngă dêh čar ta brơi ƀuh, ră anai dô̆ 21 bôh ƀat tô, song nan mơng hơdôm bôh tơring čar, ƀôn prong kah hăng Đà Nẵng, Bình Định, Quảng Ngãi amăng kual huĭ rơhyư̆t, khul pơgang glông guai ia rơsĭ hmâo gum hrom hăng sang anô̆ hơdôm pô ƀat tô song nan iâu pơthưr hơdôm bôh ƀat tô song nao pơ̆ anih dô̆ kơđăp pơhlôm. Kơ-iăng Khua dêh čar ta rơkâo hơdôm tơring čar, ƀôn prong Đà Nẵng, Quảng Nam tañ pơtô brơi hơdôm bôh ƀat tô song tơbiă mơng kual huĭ rơhyư̆t mơng kơthel. Hrom hăng anun đing nao pơhlôm abih bang mơnuih ƀôn sang ƀơi hơdôm kual hmâo tơhnal ia ling kor, lŏn tơhlom ăt kah hăng prăp lui pok pơhai jơlan gah ba đuăi mơnuih ƀôn sang hăng kông ngăn mơnuih ƀôn sang pơhlôm, hrom hăng anun pơhlôm pơgang klin Covid-19 dong./.

Siu H’ Prăk: Pô pơblang