VOV4.Jarai -  Lơ 15/10, ƀơi Hà Nội hmâo pơphun ngă Lơphet hơdor glăi 91 thun hrơi pơdŏng Khul pơlir hơbit Đah kơmơi Việt Nam (20/10) hăng ƀơk pri bơni Đah kơmơi Việt Nam. Nao pơhmư̆ hăng pơhiăp amăng mông ngă lơphet, Kơ-iăng Khua dêh čar ta ơi Phạm Bình Minh hơ-ư̆č hmưi hơdôm khul grŭp, adơi amai hmâo mă pri bơni Đah kơmơi Việt Nam.

Pơdah pran jua čang rơmang pơ̆ anăp anai hơdôm khul grŭp, adơi amai ư-ang hmâo čơkă pri bơni djă pioh dong tơlơi hor, tơlơi čang rơmang pơčeh phrâo, pơplih phrâo, pơjing rai hơdôm anăn păn gơnam Việt djơ̆ tơhnal jar kơmar pơkă. Kơ-iăng Khua dêh čar ta ơi Phạm Bình Minh rơkâo hơdôm ding jum, gơnong bruă, tơring čar, ƀôn prong đing nao, ngă tui klă hloh dong hơdôm hơdră bruă pioh kơ tơlơi pơđĭ kyar mơng đah kơmơi lăi hrom hăng adơi amai pơphun bruă lăi ha jăn. Hơdôm gưl Khul pơčeh phrâo dong, pok prong tô nao rai, gơgrong hlâo gum hrom hăng hơdôm ding jum, gơnong bruă, hơdôm bôh anom bơwih ƀong kiăng pok pơhai ba glăi bôh tơhnal hloh dong Akô̆ bruă “Djru đah kơmơi pơphun bruă”. Kiăng jai hrơi jai hmâo lu khul grŭp, đah kơmơi pơphun bruă mă truh kih./.

Siu H’ Prăk: Pô pơblang