VOV4.Jarai - Mơguah lơ 12/7, ƀơi Ƀirô mă bruă Kơnuk kơna, Kơ-iăng Khua dêh čar ta ơi Vũ Đức Đam, Khua Grŭp črâo ba bruă pơgang, pơgăn klin Covid-19 dêh čar ta git gai mông jơnum lăng nao rai amăng tivi hăng khua ƀôn prong Hồ Chí Minh kơ bruă pơgang, pơgăn klin amăng rơnuk anai. Amăng mông jơnum, Kơ-iăng Khua dêh čar ta ơi Vũ Đức Đam lăi rơđah: truh ră anai, hơdôm kual dô̆ čơlah hơbit hmâo pok pơhai laih năng ai ñu 70% bôh thâo. Yua anun, ƀôn prong Hồ Chí Minh gum hrom hăng Ding jum ia jrao dêh čar pel ĕp tañ pok pơhai dô̆ čơlah ƀơi sang. Kơ-iăng Khua dêh čar ta jao Ding jum ia jrao dêh čar pel ĕp hăng kơsem min glăi hơdôm tơlơi pơkă kơ dô̆ čơlah ƀơi sang djơ̆ hăng bôh nik mơng ƀôn prong. Kơ-iăng Khua dêh čar pơtă ƀôn prong đing nao truh kơ mơnuih ƀun rin, mơnuih tơnap tap. Kiăo tui anun, rơngiao kơ hơdôm jơlan gah mơng gong gai glăk pok pơhai lĕ ƀirô jơnum min djop djuai ania mơnuih mơnam dêh čar Việt Nam hơdôm gưl khom iâu pơthưr hơdôm bôh anom bơwih ƀong hăng mơnuih ƀôn sang gum hrom hơdôm mơnuih anai./.

Siu H’ Prăk: Pô pơblang