VOV4.Jarai - Kơ-iăng Khua dêh čar ta ơi Vũ Đức Đam, Khua Grŭp črâo ba bruă pơgang pơgăn klin Covid-19 dêh čar ta phrâo jơnum hăng Khua tơring čar Đồng Nai. Đĭ pơhiăp črâo ba lom dô̆ jơnum, Kơ-iăng Khua dêh čar ta ơi Vũ Đức Đam pơtă, tơring čar Đồng Nai giăm hăng ƀôn prong Hồ Chí Minh, hmâo rơbêh ha mơkrah klăk čô mơnuih mă bruă amăng kual sang măi, hmâo tơdrun tum păn, hmâo rô nao rai hăng Bình Dương lu... tơdah pioh klin tưp mut amra ngă tơnap tap biă.

Yua anun, tơring čar khom wai lăng kơjăp mơnuih mơng ƀôn prong Hồ Chí Minh, Bình Dương nao pơ̆ Đồng Nai hăng pơwot glăi. Kơ-iăng Khua dêh čar ta ơi Vũ Đức Đam lăi rơđah, wai lăng kơjăp ƀu djơ̆ pơgăn khut khăt mơtăm ôh mơ̆, khom pơtrut kơtang mă yua bôh thâo măi mok kiăng wai lăng mơnuih găn nao rai. Tơdah hmâo klin ngă thơ, khua tơring čar Đồng Nai khom tŭ ư hrom guang dar rơguăt mơng phun mơtăm, ngă tañ, pơhlôm djop gơnam mă yua, gơnam tam kiăng khul mơnuih mă bruă gah ia jrao hơđong pran jua, đing nao bruă mă pơgang, pơgăn klin mơng pô./.

Siu H’ Prăk: Pô pơblang