VOV4.Jarai - Čơtlăm tom brơi (20/7), Kơ-iăng Khua dêh čar ta ơi Vũ Đức Đam, Khua Grŭp črâo ba bruă pơgang, pơgăn klin Covid-19 dêh čar ta mă bruă hăng khua mua ƀôn prong Hồ Chí Minh kơ bruă pơgăn klin hăng tơlơi tlâ̆o vaccine. Tui hăng  Kơ-iăng Khua dêh čar ta, Kơnuk kơna hăng Grŭp črâo ba bruă pơgang pơgăn klin Covid-19, biă ñu Khua dêh čar ta đing nao biă tơlơi klin ruă ƀơi ƀôn prong Hồ Chí Minh.

Kơ-iăng Khua dêh čar ơi Vũ Đức Đam

Bơhmu hăng tơring čar Bắc Giang, ƀôn prong Hồ Chí Minh hmâo tơlơi pha ra prong biă kơ tơlơi bơwih ƀong – mơnuih mơnam, yua anun Kơnuk kơna lăi nao laih hơdôm tơlơi tơnap hăng glêh glar mơng mơnuih ƀôn sang ƀôn prong. Kơ-iăng Khua dêh čar ta lăi rơđah, bruă dô̆ ataih nao rai khom tơpă, khă hmâo lu anih anom dô̆ ataih nao rai tơnap hai samơ̆ ăt khom hruă kơjăp mơn. Ding jum ia jrao dêh čar ta amra đing nao đut hlah kơ gơnam mă yua brơi ƀôn prong Hồ Chí Minh, khă hnun hai, rơgao kơ tơlơi ba tơbiă mơng ƀôn prong hăng 18 mơta bruă, lu mơta gơnam mă yua kiăng blơi tơnap, yua anun khom hơneč mă hơdôm gơnam hmâo hơđăp hăng gir run pơhrŏ trun tơlơi F0 pơdah gah rơngiao rơnang jing kơtang đĭ./.

Siu H’ Prăk: Pô pơblang