VOV4.Jarai - Bruă pơgang klin Covid-19 amăng ƀôn prong Hồ Chí Minh ăt dŏ sui pơ anăp dong, yua anun djop anom bruă kiăng pok pơhai lu hơdră bruă lăp djơ̆ kiăng kơ hơdôm sang măi pơkra pơjing gơnam ƀong huă hăng rơdêh dưi pơgiăng hyu gơnam pơhlôm tơlơi hơdip kơ mơnuih ƀon sang. Anai lĕ tơlơi lăi pơtong mơng Kơ-iăng khua dêh čar ta ơi Vũ Đức Đam, Khua khul git gai dêh čar amăng pơgang klin Covid-19 amăng mông nao pel ĕp bruă pơgang klin ƀơi sa, dua anih pơkra pơjing gơnam tam, sĭ mơdrô amăng hrơi tom brơi (6/8) ƀơi ƀôn prong Hồ Chí Minh. Kiăng pơhlôm brơi bruă pơkra pơjing na nao rĭm hrơi, rơnuk rơnua, Kơ-iăng khua dêh čar rơkâo ƀôn prong Hồ Chí Minh tañ tlâ̆o ia jrao pơgang klin brơi mơnuih mă bruă ƀơi hơdôm sang măi phun. Hơdôm anom bơwih ƀong sĭ mơdrô pơhlôm kĭ hră pơkôl hăng anom bruă ia jrao kiăng pơhlôm ngă tui klă bruă pơgang klin rĭm hrơi.

Siu Đoan: Pơblang