VOV4.Jarai - Mơguah (5/8), Grup hyu mă bruă mơng Kơnuk kơna yua Kơ-iăng khua dêh čar ta ơi Vũ Đức Đam ba jơlan hlâo hơmâo nao pel ĕp kơ bruă pơgang klin ƀơi Bình Phước. Grup hyu mă bruă hơmâo nao pel ĕp bruă pơjrao mơnuih ƀă klin Covid-19 ƀơi sang ia jrao pơjrao mơnuih ƀă klin tơring glông Đồng Phú, Bình Phước. Sang ia jrao anai prong 150 boh sưng, pok mơng lơ 30/7 truh ră anai hăng glăk pơjrao brơi 43 čô mơnuih ƀă klin.

Hlâo anun, sang ia jrao hơmâo pơjrao suaih brơi 3 čô mơnuih hăng ƀing gơñu dưi glăi pơ sang laih. Kơ-iăng khua dêh čar ơi Vũ Đức Đam tŭ yap hăng lăng yôm hơdôm tơlơi gir run mơng nai ia jrao, ơi ia jrao amăng bruă pơjrao brơi mơnuih ƀă klin Covid-19. Kơ-iăng Khua dêh čar lăi pơtong, hrŏm hăng hơdră pơjrao mơng Ding jum ia jrao, tơring čar kiăng pơlir hăng bruă pơjrao djop mơta mơng Đông y hăng Tây y hăng ngă gêh gal brơi mơnuih klin dưi hơdip hăng pơjrao tơlơi ruă. Ră anai, Bình Phước hăng ƀôn prong Hồ Chí Minh hơmâo mrô mơnuih ƀă klin lu hloh, yua anun Bình Phước ƀu dưi pơtah tai amăng bruă pơgang klin.

Siu Đoan: Pơblang