VOV4.Jarai - Kơ-iăng khua dêh čar ta ơi Vũ Đức Đam rơkâo djop ding jum, anom bruă bơdjơ̆ nao sem lăng tơlơi rơkâo mơng Khul bơwih brơi tuai čuă ngui Việt Nam, rơkâo hơdră bruă ječ kiăng kơ djru, pơsir hĭ hơdôm tơlơi tơnap tap yua bơbeč mơng klin COvid-19 hăng gơnong bruă tuai čuă ngui. Tơlơi rơkâo mơng khul bơwih brơi tuai čuă ngui Việt Nam kơ hơdră djru ječ brơi hơdôm anom bruă bơwih brơi tuai čuă ngui hăng ngă tui hră pơsit tlâ̆o pơgang vaccine amăng thun blan klin Covid-19 lar hyu, Kơ-iăng khua dêh čar ta ơi Vũ Đức Đam hơmâo pơhiăp tui anai: Ding jum kơčăo bruă hăng tuh pơ alin git gai, gum hrŏm hăng ding jum gru grua, bơrơguăt drơi jăn hăng tuai čuă ngui, hơdôm ding jum anom bruă bơdjơ̆ nao sem lăng tơlơi rơkâo mơng Khul bơwih brơi tuai čuă ngui Việt Nam, rơkâo ba tơbiă hơdôm hơdră bruă djru ječ, pơsir hĭ tơnap tap yua bơbeč mơng klin Covid-19 hăng gơnong bruă tuai čuă ngui, pơƀut glăi, lăi pơthâo Khua dêh čar amăng 6 blan akŏ thun 2021.

Siu Đoan: Pơblang