VOV4.Jarai - Čơtlăm lơ 2/8, ƀơi Ƀirô mă bruă Kơnuk kơna, Kơ-iăng Khua dêh čar ta ơi Vũ Đức Đam, Khua Grŭp črâo ba bruă pơgang, pơgăn klin Covid-19 git gai bruă jơnum lăng nao rai amăng tivi hăng Khua ƀôn prong Hồ Chí Minh kiăng pok pơhai hơdôm bruă pơgang, pơgăn klin Covid-19. Tơlơi lăi pơthâo glăi amăng mông jơnum, Khua Jơnum min mơnuih ƀôn sang ƀôn prong Hồ Chí Minh Nguyễn Thành Long brơi thâo ƀôn prong hmâo hruă kơjăp ngă tui Tơlơi črâo ba mrô 16 mơng Khua dêh čar tui jơlan gah “Rơđah – tơpă – ba glăi bôh tơhnal”, pơhlôm ngă tui ha amăng plĕ ƀơi ƀôn prong, pơkă rơđah 7 grŭp mơnuih dưi tơbiă ƀơi jơlan mơng 6 mông mơmot truh 6 mông mơguah hrơi tơdơi. Amăng mông jơnum, Kơ-iăng Khua dêh čar ta ơi Vũ Đức Đam rơkâo Ding jum ia jrao pha brơi dong vaccine kơ ƀôn prong Hồ Chí Minh kiăng huăi tơ̆i đưn bruă tlâ̆o pơgang klin. Kơ-iăng Khua dêh čar ta rơkâo ƀôn prong Hồ Chí Minh hmâo hơdôm bruă mă khăng khop hloh, kơtang hloh kiăng djă pioh kơjăp anô̆ pơhlôm, pơplih tañ anih amra hmâo klin ngă ƀơi abih bang hơdôm bôh quận, tơring glông. Grŭp črâo ba lăi rơđah bruă tlâ̆o vaccine jing tơlơi dưi hăng bruă gơgrong mơng rim mơnuih pioh kơ tơlơi suaih pral drơi pô hăng plơi pla./.

Siu H’ Prăk: Pô pơblang