VOV4.Jarai - Lơ 17/9, Kơ-iăng khua dêh čar ơi Vũ Đức Đam hăng khua mua hơdôm ding jum, anom bruă kơnuk kơna hơmâo jơnum git gai bruă pơgang klin Covid-19 ƀơi tơring čar Tiền Giang. Pơhiăp ƀơi mông ngă bruă, Kơ-iăng khua dêh čar ơi Vũ Đức Đam bơni tơlơi gir run glêh glar mơng djŏp gưl ping gah, anom bruă mơng tơring čar Tiền Giang amăng bruă pơgang klin Covid-19; biă ñu lĕ bruă djru mơnuih ƀon sang; laih dong pơhmư̆ tơlơi rơkâo mơng tơring čar anai. Kơ-iăng khua dêh čar ơi Vũ Đức Đam hơmâo lăi nao tơlơi aka ƀu dưi ngă, ngă bruă dŏ tơdu mơng tơring čar Tiền Giang amăng bruă pơgang klin, kiăng lăng ba hloh dong amăng hrơi blan pơ anăp đah mơng tañ dưi pơgang klin. Hăng hơdôm anih lui laih guang dar khŏm wai lăng kơjăp, krăp lăng tơlơi pơplih phrâo mơng klin kheng đah mơng dưi pơwơ̆t glăi tui hơđăp.

Siu H’Mai: Pơblang