VOV4.Jarai - Tlam lơ 28/6m ƀơi Sang bruă Kơnuk kơna, Kơ-iăng khua dêh čar ơi Vũ Đức Đam, Khua anom git gai pơgang klin Covid-19 hơmâo jơnum lăng nao rai amăng tivi hăng 5 boh tơring čar: Quảng Ngãi, Bình Thuận, Khánh Hoà, Bình Định, Phú Yên kơ bruă pơhlôm, pơgang klin Covid-19. Ră anai, hơdôm boh tơring čar anai glăk ječ ameč pơjrao, pơčrang kman, pơđĭ tui anih dŏ pơčlah hăng pran jua “abih bang anom bruă čar gum ngă bruă, gir dưi pơgăn klin tañ hloh”. Kơ-iăng khua dêh čar ơi Vũ Đức Đam lăi bruă bơlăi nao rai tơlơi pơhing F0, F1, F2 mơng hơdôm tơring čar kaih đơi. Tơlơi hŭi rơhyưt klin ngă mơng hơdôm boh tơring čar ăt dŏ prong đôč. Kơ-iăng khua dêh čar kiăng wơ̆t aka ƀu hơmâo klin, hơdôm boh tơring čar ăt pơtrut tañ bruă pơčrang kman, gir djă bong tơlơi rơnuk rơnua kơ hơdôm boh sang  ia jrao; pơsit hơdôm kual amuñ hơmâo klin gah rơngiao kual plơi pla đah mơng mă drah pơčrang kman, dưi pơgang hlâo.

Siu H’Mai: Pơblang