VOV4.Jarai-Mơguah lơ 11/7, grup mă bruă mơ̆ng Ding jum ia jrao yua Kơ-iăng Khua ding jum, ơi Đỗ Xuân Tuyên ngă khua, hơmâo mă bruă hăng khua mua git gai, pơhlôm, pơgang klin Covid 19 ƀơi tơring čar Dak Lak. Yap truh lơ 11/7, tơring čar Dak Lak hơmâo 7 čô mơnuih ƀă Covid 19, amăng anun 4 čô mơnuih pơjrao hlao laih.

Hơdôm ƀing ƀă klin ƀơi Dak Lak pơdjơ̆ nao ƀing ƀă klin mơ̆ng Đà Nẵng, Bắc Ninh hăng ƀôn prong Hồ Chí Minh. Dak Lak hlăk pơčlah mơnuih đing đăo jĕ giăm ƀing ƀă klin, brơi pơčlah abih 139 čô mơnuih hăng brơi pơčlah pơ sang anŏ 9 rơbâo čô. Kơ bruă tui kru ĕp mơnuih jĕ giăm hăng ƀing duăm ruă lĕ hlăk ngă ječ ameč mơ̆n, Dak Lak akŏ pơjing 280 grup mă bruă hyu ĕp tui kru.

Pơhiăp ƀơi mông jơnum, ơi Đỗ Xuân Tuyên lăng yôm biă mă bruă mă bong glăi hăng klin mơ̆ng Dak Lak thun blan rơgao; pơtă pơtăn tơring čar, ăt pơtum lu mơnuih, gơnam yua mă bruă, biă mă ñu pơpha bruă mă, jao mơnuih djru bruă kiăng hmao bong glăi hăng klin kheng pơ anăp anai.

Nay Jek: Pơblang