VOV4.Jarai - Tlam lơ 12/11, grup khua mơng Ding jum ia jrao yua Kơiăng khua ding jum ia jrao ơi Nguyễn Trường Sơn ngă khua grup hơmâo mông ngă bruă hăng Anom git gai pơgang klin Covid-19 mơng tơring čar Dak Lăk kơ bruă čơkă pơjrao mơnuih ruă. Mơng lơ 27/4 truh ră anai, Dak Lăk čih pioh hơmâo 5.872 čô mơnuih ƀă klin Covid-19. Amăng 14 hrơi giăm anai, Dak Lăk čih pioh hơmâo 2.074 čô mơnuih ƀă klin. Amăng anun 1.429 čô mơnuih ƀuh amăng plơi pla, dưm dưm hăng 68,9% mrô mơnuih ƀă klin hơmâo ƀuh. Hăng bruă akŏ pơdong hăng pơphun čơkă pơjrao mơnuih ruă: tơring čar hơmâo akŏ pơdong 6 anih pơjrao mơnuih ƀă klin Covid-19 hăng 3.222 boh sưng đih tui gru thap 3 gưl. Ƀơi anăp tơlơi hŭi rơhưč anun, tơring čar amra pơđĭ tui mrô sưng đih kơ mơnuih ƀă klin truh 5.580 boh sưng ƀơi hơdôm anih pơjrao.

Kơ-iăng khua ding jum ia jrao Nguyễn Trường Sơn pơhiăp ƀơi mông ngă bruă

Kiăng dưi pơgăn klin Covid-19, ƀơi mông ngă bruă, Dak Lăk rơkâo hơdôm Ding jum, anom bruă, biă nu Ding jum ia jrao djru ba măi mok, mơnuih mă bruă mơng hơdôm boh tơring čar djru kơ Dak Lăk amăng bruă pơjrao mơnuih ƀă klin Covid-19; djru ba vaccine kơ tơring čar đah mơng tlâ̆o pơgang kơ abih bang mơnuih mơng 18 thun truh kơ ƀing tha, mơnuih glăi mơng kual hơmâo klin, hăng ƀing čơđai mơng 12 truh 17 thun; djru pơkra anih anom, mă yua sang ia jrao tơhan pơdong jăng jai ƀơi sang glông gưl 3 pơjrao brơi mơnuih ruă kơtang tơdah ƀu bit anih brơi đih pơjrao mơnuih ƀă klin Covid-19.

Siu H’Mai: Pơblang