VOV4.Jarai - Amăng rơwang nao čuă hăng mă bruă ƀơi tơring Đaknông, mơguah lơ 8/4, Kơ-iăng Khua Ding jum wai lăng mơnuih mă bruă tơhan rơka ruă hăng mơnuih mơnam dêh čar ơi Lê Văn Thanh hmâo nao pel ĕp tơlơi mơnuih mă bruă, bruă mă ƀơi Sang bruă Nhôm Daknông-TKV, ƀơi să Nhân Cơ, tơring glông Dak R’lấp. Sang bruă Nhôm Daknông-TKV mă yua mơng thun 2017, ră anai hmâo 1.045 čô mơnuih mă bruă.

Hơdôm thun rơgao, sang bruă hmâo ngă tui djơ̆ laih tơlơi pơkă kơ kĭ pơkôl hăng mơnuih mă bruă, nô̆p djop mơta hră pơgang kơ mơnuih mă bruă tui tơlơi pơkă. Tơlơi hơdĭp mơda mơnuih apăn bruă, mơnuih mă bruă amăng sang bruă ƀu pơdơi đĭ tui, mơng prăk blan, hơdră bruă gum djru, hơdră djru kơ sang dô̆ lu mơnuih hăng hơdôm ring bruă tŭ yua hrom, bôh thâo, bơkơjăp drơi jăn. Sang bruă dô̆ gum hrom, djru hơdôm ngăn rơnoh keh prăk ƀơi plơi pla, hơdôm bruă gum djru, hơđong tơlơi hơdĭp mơda mơnuih mơnam hăng mrô prăk rơbêh kơ 69 klai prăk. Kơ-iăng khua Ding jum Lê Văn Thanh pơsit yôm tơlơi đing nao mơng khua Sang bruă Nhôm Daknông-TKV pioh kơ tơlơi hơdĭp mơda mơnuih mă bruă hăng hơdôm bruă mă hơđong tơlơi hơdĭp mơnuih mơnam, djru sang anô̆ gah hơdră bruă gum djru, neh wa djuai ania ƀiă hmâo tơlơi hơdĭp tơnap tap./.

Siu H’ Prăk: Pô pơblang