VOV4.Jarai - Abih mông tlam lơ 27/12, ƀơi Sang bruă Khua git gai pơ ala mơnuih ƀon sang, Ding kơna Ding jum kơđi čar, Kơ-iăng khua git gai pơ ala mơnuih ƀon sang dêh čar ơi Trần Thanh Mẫn bưp 55 čô khua nao pơhmư̆ mông Jơnum “Yua kơ mơnuih djơ̆ jrao hret” tal 4, rơwang thun 2021-2026. Tơdơi kơ hmư̆ tơlơi lăi pơthâo hăng tơlơi pơgôp hiăp mơng ƀing khua, pơhiăp ƀơi mông jơnum, Kơ-iăng khua git gai pơ ala mơnuih ƀon sang dêh čar ơi Trần Thanh Mẫn lăi, tơlơi blah ngă hăng jrao măt yua dêh čar Mi ngă amăng thun blah wang bơi Việt Nam ngă kơ 4 klăk 800 rơbâo čô mơnuih djơ̆ jrao hăng rơbêh 3 klăk čô mơnuih lĕ hơmâo tơlơi ruă yua jrao ngă. Bruă pơsir hĭ tơlơi truh yua jrao hret ngă tơdơi kơ abih thun blah wang jing bruă kiăng ngă ječ, ngă sui, hơmâo tơlơi khăp pap prong biă, jing tơlơi gơgrong bruă mơng abih bang mơnuih, đah mơng hơdor kơ mơnuih djru blah ayăt ƀă jrao hăng ƀing hơmâo tơlơi ruă yua jrao hret ngă Việt Nam. Kơ-iăng khua git gai pơ ala mơnuih ƀon sang dêh čar kiăng Ping gah, gong gai djŏp gưl hăng abih bang anom bruă kơnuk kơna ngă klă na nao hơdôm tơlơi djru mơng Ping gah, Kơnuk kơna hăng ƀing djơ̆ jrao hret; ngă gal brơi kiăng Khul mơnuih djơ̆ jrao hret dioxin djŏp gưl ngă giong bruă Ping gah, Kơnuk kơna jao amăng rơnuk phrâo.

Siu H’Mai: Pơblang